نجرب !!
في مقاييس كتير بتقول : بلاش مُجازفة وبلاش ناخد قررات في لحظة حماس، إلا إني بقول لازم نكسر حاجز الخوف ونغوص خلف الجدران ونستسلم للحظات الحماسية اللي بتيجي بدون مقدمات، ونفرد جناحاتنا ونطير ونشوف هيحصل أي؟ ما إحنا مش هنفضل نخاف كدا مِنْ بعيد لازم نصارع الخوف وفي الحالتين إحنا الكسبانين!
الموضوع يبان إنه جنوني شوية، أممم شويتن صح؟
بتكلم هنا عن الأفكار الحماسية اللي بيكون ليها نتيجة مباشرة وحتمية في نفس ذات الوقت اللي بنقوم فيه بتنفيذ القرار، تخيل كدا أي الأفكار الحماسية اللي بتحتل دماغك يوميًا؟ طيب أنت عارف إن من ضمن الأفكار دي في فكرة نتيجة تنفيذها هيكون ليه تأثير إيجابي كبير على حياتك؟
أكيد دلوقتي لازم نعمل فلترة للأفكار دي ونشوف أي الفكرة الصحية من وسط كل الأفكار الحماسية دي؟ طبعًا لازم نعمل كدا ما أكيد مش منطقي إننا ننفذ أي فكرة لمجرد إنها إتوجدت في لحظة حماسية!
خمس مؤشرات هتعرف من خلالهم إنك لازم تستجيب للأفكار الحماسية والمؤشرات دي بتدل إن الفكرة صحية وهيكون ليها مردود إيجابي؛ يلا بينا نشوف أي هما :_
1/إن الفكرة دي تكون منطقية : بمعني إنها فكرة مناسبة ليك كإنسان وتكون مناسبة لقدراتك يعني مش معقول هتكون واقف بتتأمل السماء وفجأة تجيلك فكرة إنك لازم تطير دلوقتي فتقوم ترمي نفسك من البلكونة بحجة إنك كدا عملت إستجابة لفكرة حماسية! لا كدا كلنا عارفين أي النتيجة لو نفذنا الفكرة دي!
2/تكون فكرة مصحوبة بتحسين: بمعنى إنها فكرة حماسية بس جت في وقت فيه كركبة ولخطبة والفكرة دي متحاوطة بتحسين وفلترة، زي مثلاً إنك تكون قاعد مكتئب والدنيا كلها فوضى حواليك فتلاقي فجأة جتلك فكرة إنك لازم دلوقتي تقوم توضب الكركبة اللي حواليك.في الحالة دي لازم نستجيب للفكرة دي فورًا، لأنك بعد ما تقوم تنفذ فكرة إنك توضب وترتب هتلاقي إنك هديت ومزاجك بقى أحسن.
3/إن الفكرة تكون ليها علاقة بالطبيعة: بمعنى إننا كتير بنكون داخلين في موود كئيب وبنكون فاقدين الشغف وحاسين بإحباط شديد وفجأة بنلاقي فكرة حماسية بتقولنا تيجي نقوم نزرع؟ أي ده بس أنا معنديش بذور مفيش مشكلة ننزل نشتري بذور حتى لو هنزرع نعناع بس أبوس إيدك استجيب للفكرة وقوم نفذ!
4/فكرة حماسية إستكشافية : بمعنى إنها بتكون فكرة بتحركك فكرة بتقولك قوم ندور على ماهية الحاجة دي ! والحاجة دي بتكون قدامك بالفعل بس عقلك بيقولك أنا عايز أعرف أصلها، في الحالة دي استجيب فورًا علشان بجانب إنك استجبت فأنت استفدت معلومات جديدة.
5/ فكرة حماسية بتحارب الكسل: أيوه صح زي ما أنت قرأت كدا، في لحظات بتكون قاعد مكانك في زون اللاشيء وفي فكرة كدا بتجيلك بتقولك ما تقوم نخرج؟ طيب ما تقوم نطبخ؟ أي فكرة مصحوبة بحركة فدي إشارة من عقلك علشان يساعدك تتغلب على الكسل، فأرجوك استجيب ليها وبلاش تتغاضى عنها.
الأفكار الحماسية دي بتكون مساعدة من عقلك إنه يخرجك من حالة حزن، أو حالة فقدان شغف، أو حالة ملل، لذلك عزيزي الجميل لما تلاقي مؤشر من دول بادر بتنفيذ الفكرة الحماسية دي لأنك بعد تنفيذ الفكرة دي هتكون أكثر إيجابية♥️
#فاطمة_شجيع
#مقدسية ☕
التعليقات