في سوق العمل ما أنت إلا كتلة من المهارات، أنت شخص مجهول الهوية، والحاجة الوحيدة الـ بتدل على وجودك هي مهاراتك وقدراتك، فالشخص الناضج والواعي بقوالب وتطورات المجتمع مش هيفرق معاه التحصيل الكمي الـ بيكون على هيئة درجات وأرقام لا مكان لها في سوق العمل والعلاقات، لأن المقياس الوحيد لقبولك داخل المجتمع العملي هو مهاراتك يا صديقي.
من فترة كنت في مكان ما وحصل جدال بين شخصين هناك واحدة فيهم بتقول إن المجتمع مش عادل وبتتكلم عن إن إزاي الإنسان يفضل يتعلم بداية من المرحلة الإبتدائية حتى مرحلة الجامعة وأحيانًا ما بعد الجامعة وفي الأخر مش لاقي وظيفة حكومية؟ الحقيقة إني أنا كمان في وقت من الأوقات كنت ببص للموضوع بفس النظرة البريئة الخالية من الوعي، لأننا بكل أسف بنقولب أنفسنا في شوية أرقام لا قيمة لها، عايزين بس ندرك إن خمس سنين من التعلم تعادل مئات السنين من التعليم، ومش تقليل خالص من رحلتنا التعليمية على مدار سنين حياتنا الدراسية، لكن الحقيقة المطلقة إن صاحب المهارات هو الـ هيفوز بشكل قاطع وحاسم في النهاية على صاحب الشهادات الأكاديمية البحتة.
في حين إن بيكون في شخص تاني في نفس الرحلة بس سبق الكل بمهاراته وقدراته، الموضوع في الأول والأخر توفيق من ربنا، لكن مينفعش نبقى قاعدين مكانا من غير ما نسعي إننا نطور أنفسنا وننمي مهاراتنا وبعدين نقول إن الدنيا مش عادلة، علشان فيه فرق كبير بين التعليم الأكاديمي والتعلّم الذاتي، والفرق كبير ويستحق حقيقي إننا نتأمله ونحاول نخرج من زون التعليم لـ زون التعلم، طيب معنى كلامك يا فاطمة إننا نبطل دراسة وتعليم؟
لا إطلاقًا، بس على الأقل نستغل الفترات الطويلة دي في التعليم إن يكون لينا نصيب من التعلم الذاتي الـ من خلاله هتكون شخص معلوم الهوية في سوق العمل، حاول خلال فترة دراستك إنك تتقن مهارتين بس من المهارات المطلوبة، وقتها هتتخرج وأنت واقف على أرض صلبة، لأن زي ما قولتلك في البداية العبرة بمهاراتك الحقيقية مش شهاداتك.💙
#فاطمة_شجيع
التعليقات