"برطمان التحدي😃"

حابة أشارك معاكم فكرة لطيفة بنعملها أنا وأخواتي؛ وهي إننا كاتبين عدد لا بأس به من التحديات، كل تحدي في ورقة وحاطين الورق في برطمان صغير، وكل يوم أول ما بنصحى كل واحدة فينا بتسحب ورقة، وتنفذ التحدي اللي فيها..

التحديات متنوعة، ما بين تحديات ترفيهية وتحديات في جوانب مختلفة؛ زي تحدي قراءة سورة البقرة، كف الأذى، عمل أكلة جديدة، توضيب البيت، عمل مشروب، المحافظة على صلاة السنن، عمل جلسة ذكر، عمل ورد استغفار، إلخ..

الهدف من الفكرة دي تغيير الروتين وعمل روح حماسية في يومنا، وفي نفس الوقت بنستفاد جدًا لما يكون التحدي ذات نفع جماعي؛ والتحديات الفردية بتكون مشجعة جدًا علشان اللي بيفوز في نهاية كل أسبوع بيكون ليه هدية كمكافأة على التزامه بتنفيذ التحديات الخاصة بيه..

كل يوم كل واحدة بتسحب ورقة وبعد ما تشوف إي التحدي اللي طلعلها بتكتب على الورق تاريخ اليوم واسمها، وعلى نهاية اليوم لو نفذت التحدي بتكتب على الورقة تم، ولو منفذتهوش بتحط في حصالة الصدقات غرامة علشان ملتزمتش بالتحدي وبتكتب على الورق أخفقت..

جربوها ونهاية كل أسبوع شاركوني وصلتوا لـ إي، وكمان لو عندكم مهام أسبوعية كبيرة ممكن تقسموها على هيئة تحديات على مدار الأسبوع وعلى أخر الأسبوع هتلاقوا نفسكم أنجزتوها، لأنكم حولتوا الموضوع من عبء للعبة بتستمتعوا وأنتوا بتعملوها ..♥☕

#فاطمة_شجيع

#كل_يوم_فكرة