-إنتا بتنصب على الناس
-مين قالك كده
-الناس كلها بتقول كده
-حدد لي حد منهم
-أهه .. صدقت يا عم
-أغلب اللي بتتكلم عليهم إما استلموا كتبهم، وإما استردوا مالهم
-لا يا راجل
-وأزيدك من الشعر بيت فيه اللي استلم فلوسه وكتبه، ورجع يبتزني للحصول على المزيد من الهدايا مهددا بالتشهير
-والمفروض أصدقك
-عادي .. لا تصدقني
-يا عم أنا بحترم عقليتك جدا، إنتا مش عارف يعني إيه إنك تكون عندك دماغ جوهرة زي ديه، بس إنتا كمان لازم تحترم عقليتي
-وأنا عشان احترم عقليتك أطلع نصاب
-أمال إيه؟
-ده أنت أخذت قرار خلاص، وأصدرت حكم نهائي
-والله ده اللي أنا شايفه
-والله الحكم في الآخرة لله، وفي الدنيا للقانون، وليس لك أنت
-يلا بطّل هريّ بقى، وكمان القانون يا حبيبي لا يحمي المغفلين
-أنا أثق في عدالة القانون المصري
-ما أنا بقولك القانون لا يحمي المغفلين
-يا عم أنا هسايرك وهمشي مع دماغك للآخر، إيه تعريفك للمحتال أو النصّاب؟
-إنه ياكل حقوق الناس، يسرق فلوسهم
-وإنت شوفتني مديت إيدي في جيب حد؟
-لا ناصح، مش بقولك القانون لا يحمي المغفلين، ما أنت بتقنعه يحوّل لك المبلغ اللي تقول عليه
-طيب هو مش بيحصل على منتج أو خدمة نظير هذه الأموال؟
-فين الخدمة أو المنتج اللي بيحصل عليه
-أههه، عندي كتب أبيعها
-أنا دخلت الجروب عشان أشوف المغفلين اللي بتقنعهم بكتاب أبو 50 جنيه، يعني عايز تقنعني إن الكتب ديه عندك
-لو جيت لي النهاردة، ولقيتها كلها عندي أو جاهزة للشحن، تدفع كم؟
-عادي ممكن تكون عندك كتب بس برضه بتنصب على الناس
-طب والناس اللي بتستلم مني كتب، دول وضعهم إيه
-فين دول
-أهه
-هبقى أسألهم واتحقق بنفسي
-اسألهم وارجع لي، وغالب الظن إن حتى اللي استلم هيقول عليا نصاب، وينكر إن استلم
-هههههه، مش بقولك نصاب وحوارتجي
-لا .. ده بسبب الحملة التشهيرية، ومزيج غريب بين العملاء الناقمين، والمنافسين، بس عندي إثباتات بالاستلام، زي ما عندي اثباتات بالتحويلات ولم أنكر استلامي أي مبلغ من أي حد بوصفي مكتبة أو مقدم خدمة.
-قول كمان
-وتصدق، فيه كمان عملاء راضين
-يا عيني
-إيه قولك
-عادي، ممكن تكن بتبيع كتب فعلا، وعندك عملاء وكل حاجة تمام، بس ده ما يمنعش إن يبقى فيه نصباية من وقت للتاني
-يا خبر أبيض .. برضه!!
-أنا عارفك دماغ
-ده أنا عبقري بقى
-أشهد لك بده
-طيب إيه اللي يخليني متمسك بنفس الصفحة والموقع والمسمى ونفس رقم الهاتف، بل وارسل بياناتي الشخصية للجميع، مش ده نوع من الشفافية الحمقاء في محاولة للتمسك بمشروع قائم وحقيقي!
-والله إنتا دماغك ديه ما لهاش آخر، برضه نصّاب
-شوفت إنك مصر على كلام ليس له أصل من الصحة
-بص، حتى لو فيه عملاء كتيير مستريحين معاك، لو فيه عميل واحد متضرر أو محصلش على فلوسه، تفضل نصّاب.
-بس أنا بصفر الحسابات القديمة دلوقت كل فترة، خاصة وإني موثق كل حاجة، وبالتالي المديونية بتصير صفر مديونية من حين لآخر، يعني ما يكون فيه واحد ما استلمش كتبه، أو لم يسترد ماله (مع إني لا أرد المال إلا نادرا، معنديش مرتجعات).
-برضه تفضل نصّاب
-اشمعنى
-عادي، يبقى بتشغل الفلوس شوية بعد كده ترجعها لأصحابها
-يا خبر أسود!!!