السلام عليكم يا رفاق، أنا فاطمة ودي الوقفة التأملية الثانية مع ثاني حلقة من حلقات برنامج "هدى للناس"، هنسافر فيها مع بعض في رحلة حول المعاني الجميلة الـ دكتور «أحمد عبدالمنعم» ربنا يرضى عنه سلط الضوء عليها.
سورة الحجرات من السور المدنية الـ مواضيعها تتعلق بالآداب والأخلاق، بداية من أدب التعامل مع الله ورسوله، ثم التعامل مع الفسقة والتثبت من الأخبار، والصلح بين المسلمين، والنهي عن السخرية واللمز والتنابز بالألقاب، والنهي عن سوء الظن والتجسس والغيبة، وكمان من مقاصدها معالجة اللسان وبيان أثره على إيمان الفرد وأخلاق المجتمع، كمان دكتور أحمد ذكر إن هذه السورة تصلح كخطاب للناس الـ لسه داخلين الإسلام جديد أو الناس الـ عندهم فضول إتجاه دين الإسلام وأحكامه.
والحقيقة إن آيات السورة منهج رباني مُحكم، لتهذيب أخلاقنا، مع كل آية فيها بتتأمل معنى جديد وجميل في تعاملاتك مع المجتمع المحيط بيك، ومش بس كده ده ربنا بيعلمنا من خلالها فقه ترتيب الأولويات في التعامل والسورة بينت هذا الترتيب كالآتي:-
١-حق الله عزّ وجل: إننا نمتثل لأوامره ونتجنب نواهيه.
٢ـ حق الرسول: إننا نتبع سنته ونتحدث بأدب عن كلامه وأفعاله.
٣ـ المجتمع: وده بيشمل الفاسق والمؤمن والشرع بيحدد لينا نتعامل إزاي معاه.
سورة الحجرات جاءت بعد الفتح، وطبعًا مع الفتح الـ حصل هيكون في مجتمعات كتير، وعلشان نحافظ على المجتمعات دي من الانهيار كان لازم يكون في ضوابط مُحكمة الناس تمشي عليها علشان نحقق الاتزان، لذلك هنلاحظ إن آيات سورة الحجرات مليانة ضوابط لو مشينا عليها هنحظى بأخلاق حسنة. كمان من الحاجات الجميلة الـ دكتور أحمد قالها وهو بيتدبر معنى اسم سورة الحجرات: قال إن الحجرة بمعناها الواسع هي حدود الفرد واحترام شخصه وهويته وكيانه، وعلشان دينا عظيم وجه بصرنا إن احترام الفرد من احترام المجتمع في المقام الأول، ودي معادلة مُحققة بكل وضوح في ثنايا آيات السورة.
الحاجة المُبهرة بالنسبة لي في السردية الخاصة بالآية دي، "يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ" الحقيقة لما تأملت تفسيرها انبهرت بحكمة الشرع الإلهي، بيقولك إنك لما يجيلك خبر معين لازم الأول تتأكد من صحته، علشان لو صدقت بدون ما تعرف حقيقة الأمر وتبين فيما بعد إن الخبر ده كذب هتندم؛ اللحظة دي بالتحديد، افتكرت كم المرات الكتير الـ بنلاقي فيها خبر متداول على منصات السوشيال ميديا، وبستغرب إزاي الناس دي كلها بيشاركوا في نشر الخبر ده بدون ما حد يسعى إنه يتأكد من صحة الخبر، وبعدين يتبين لينا إن الخبر ده كذب، في الوقت ده بالتحديد بحس بهيبة الدين، وبعظمة أحكام الشرع الإسلامي، تخيل يا مؤمن إننا عندنا شريعة لو مشينا على نهجها كما أمرنا الله هنبقى عايشين في جنة حقيقي.
تعالوا كدا معايا فى الجزء العظيم ده من الآية السابعة، وَلَٰكِنَّ ٱللَّهَ حَبَّبَ إِلَيۡكُمُ ٱلۡإِيمَٰنَ وَزَيَّنَهُۥ فِي قُلُوبِكُمۡ وَكَرَّهَ إِلَيۡكُمُ ٱلۡكُفۡرَ وَٱلۡفُسُوقَ وَٱلۡعِصۡيَانَۚ أُوْلَٰٓئِكَ هُمُ ٱلرَّٰشِدُونَ، دكتور أحمد عبدالمنعم ربنا يرضى عنه قال عن الجزء «الإيمان يأتي ليرتقي بالناس تدريجيًا» لذلك بدخول الإيمان القلب، بالتدريج القلب هيبدأ يكره الكفر، وبعدين يكره الفسوق والخروج عن طاعة الله، ثم يكره فكرة إنه يعصي ربنا عز وجل، لحد ما يوصل لمرحلة الرشاد وده فضل من الله، يتفضل به على عباده الصادقين.
ننتقل بعدين للحث على الإصلاح، وهنلاقي إن القرآن سلط الضوء على فكرة الصلح والإصلاح في إطارهما العام والخاص، والتذكير إن المؤمنين أخوة حتى ولو نشب بينهم خلاف، كمان بيوجهنا إننا نسعى للفهم الأول ثم الحل.
لحد هنا نكون خلصنا أول جزء من سورة الحجرات وبإذن الله إن كان في العمر متسع، هكمل معاكم الجزء التاني في بوست آخر، في النهاية نستفاد من كل ده حاجة مهمة" إننا ندعي ربنا دائمًا إن ربنا يهدينا إلى أحسن الأخلاق ويهذب قلوبنا" 🌱💚
#فاطمة_شجيع
