اشتريت الكتاب ده من حوالي عشر سنين تقريباً من مكتبة ومضة أيام ما كانت مكتبة كتب 😁
اللي لفتني ليه النبذة اللي ع ضهر الغلاف اللي بتقول إن الكاتبة نصها مصري ونصها ياباني وجمعت بين الثقافتين
طبعاً أنا شدني الموضوع ده وحبيت أعرف هاكتب ايه؟ خصوصاً كمان إن اسمها سارة زيي ;) وكمان أنا طول الوقت بفكر أكتب كتاب عن تجربتي والوقت اللي عشته في اليابان؛ فاعتقدت إن ممكن يكون الكتاب ملهم ليا بشكل من الأشكال
بس الكتاب فضل مركون طول السنين دي معرفش محتواه من جوة إيه لحد ما فتحت الكيس البلاستيك اللي عليه من يومين بس
خلاصة مضمون الكتاب إنها بتتكلم عن نقاط تنحصر في نقط الحجاب ولبس البنات وعلاقات الحب والارتباط والجواز من وجهة نظرها زي ما هي فهمت من الدين
فيه حاجات كتير بتقولها كويسة ومنطقية وحاجات بتحاول تظهر إنها علمية وإنها مقتنعة بيها بعد بحث وتمحيص لكن في الحقيقة واضح جداً تأثرها بموضة الدعاة الجدد وخصوصاً معز مسعود اللي مالية الكتاب باقتباسات منه
حاجات كتير لو فكرت فيها بعقلانية هتلاقي إنهم كانوا بيهروا فيها وهي ماشية وراهم
بس يحسب ليهم وليها عموماً إن ده كان باب ليها للإلتزام وإنها تعرف إن الحجاب فرض ع الأقل، وإنها حاولت توصل خبرتها لأبناء جيلها في وقتها مكنش لازم تستنى سنين تانية كتير ع ما تفهم كل حاجة
أبو بكر الصديق أول ما الرسول قاله عن الإسلام وآمن خرج من عنده يدعو الناس للإيمان والإسلام مستناش لما يبقى جهبذ وفقيه الأول عشان يبدأ يعرف الناس الدين الجديد
وفي الآخر هي لما كتبت الكتاب ده كانت لسة بنت صغيرة عندها 21 سنة الله أعلم دلوقتي تفكيرها بقى فين وعرفت ايه أكتر وهل هي لسة مقتنعة بكل اللي كتبته في الكتاب ده ولا بقى ليها وجهة نظر مختلفة في بعض الجوانب؟
#عيب_ولا_حرام لـ #سارة_رياض
#جولة_في_الكتب #كتب_دينية
#سارة_الليثي