بصراحة دخلت الموقع هنا للبحث عن حل مشكلة مع الدعم الفني
وبعد نشر أول مشاركة، عجبني الموضوع، وسألت نفسي هو انا كنت فين؟؟
وكما قال الأولون
"أن تأتي متاخرا !! ... خير من أن ألا تأتي أبداً"
تجربتي مع خمسات
أنا عملت الأكونت على حسوب سنة في يناير 2017 بحثا عن عن فرصة عمل بعد رحلة في مجال الهندسة وحاليا أنا بائع متميز - الحمد لله - مع سابقة أعمال كبيرة - الله أكبر -
بس الحكاية بدأت منين؟
أنا اسمي أحمد مجدي، مهندس كيميائي سابق، بس قبل أي حاجة… أنا إنسان شغوف بالقراءة والكتابة ومريت بمصاعب كتير ويمكن بنفس اللي إنت فيه دلوقتي.
كنت في يوم من الأيام شايف إن شغفي بالكتابة والقراءة مجرد هواية، لحد ما الظروف خبطتني على وشي، وقالتلي:
"يا تتحرك، يا تتكسر."
في 2016 اضطريت أسيب شغلي في مجال الهندسة بعد ما كنت مدير إنتاج في مصنع، وقتها كنت شايل مسؤولية بيت… ومفيش مصدر دخل غير شغلي.
ماكانش معايا رفاهية التردد،
اضطريت أشتغل في شركة صغيرة بتصميم المواقع، وهنا اتفتحتلي بوابة لعالم جديد: عالم العمل الحر والمحتوى والتسويق الرقمي.
ماكنتش عارف أي حاجة.
بس كنت حابب أتعلم.
والأهم: كنت حابب أكون حر.
دخلت على حسوب وعملت حساب وقلت أشوف الدنيا وصبرت كتير وتعبت، اتمرّمطت، واشتغلت بمقابل صغير جداً.
بس مع كل خطوة كنت باكتشف حاجة جوايا:
إن عندي القدرة مش بس أكتب… لكن أوجه، ألهم، وأساعد.
ولما بدأت أنجح، فهمت إن النجاح مش رحلة فردية.
الناس محتاجة حد يفهمهم، يحطهم على الطريق، يشجعهم لما يقعوا، ويقنعهم إنهم يقدروا.
حسوب وخمسات تحديدا ليها فضل عليا ولا ينكر الفضل إلا كل لئيم.
حبيت أشارككم قصتي وعايز افهم ايه موضوع النقاط دي عشان انا لسه جديد في المجتمع ده.
وياريت تبصوا على الروابط بتاعتي وقناة اليوتيوب.
#أحمدمجدي