دور كده هتلاقي كل زعيم ديكتاتور في اي دولة في اي زمان لازم تلاقيه فاسد وظالم من اول فرعون مرورا بالحجاج وهتلر وستالين وصدام حسين والقذافي حتي لو كان شعبه عاش في نعيم في عهده بس هتلاقيه ظالم زي فرعون وصدام والقذافي .
طيب سؤال كده هو معقول مفيش واحد من الحكام دول مكنش كويس قبل ما يحكم وكان ناوي يبقي حاكم عادل؟؟
الإجابة اكيد كان منهم حد كويس قبل حكمه بس لما بقي الآمر الناهي في دولته بقي فاسد وظالم و السبب ببساطة في جملة واحدة "السلطة المطلقة مفسدة مطلقة" هي طبيعة النفس البشرية كده الإنسان هيظلم وهيفسد لو مفيش حد هيحاسبه لو متأكد انه مفيش بشر أعلي منه ممكن يحاسبه مفيش بشر ممكن يعترض علي كلامه وكل اللي حواليه بيعاملوه كإله.
وعشان يتم إثبات الكلام ده بطريقة علمية حديثة راح جه عالم نفس أمريكي كبير عمل تجربة بسيطة كده اسمها' سجن جامعة ستانفورد' جاب طلبة جامعة معظمهم من البيض ومن الطبقة المتوسطة وطيبين وقسمهم فريقين الفريق الأول فريق المسجونين والفريق الثاني فريق السجانين وقعدهم في مكان شبه السجن بالظبط وقال للفريق التاني عندك السلطة المطلقة انك تعمل في الفريق الأول اللي انت عاوزه وانه قواعد اللعبة انه لا قاعدة ومفيش مسألة ومحدش هيحاكمك مهما عملت في زميلك .
بعد فترة صغيرة الفريق الثاني أتعامل بكل وحشية وهمجية وعنف مع زملائهم من الفريق الأول لدرجة انه عالم النفس ده وقف التجربة فورا ومكملهاش وطلع بمقولته «السلطة المطلقة تخرج أسوأ ما في النفس البشرية»
وبعيدا عن الغرب وعلمهم وقبل عالم النفس ده ب 14قرن سيدنا ابو بكر الصديق وصل للقاعدة دي لما تولي الخلافة بعد وفاة الرسول وجمع المسلمين ومقالهمش انا صاحب محمد وانا اول واحد اسلمت فيكم واسمعوا كلامي أنا بس لكن قالهم:
"أما بعد أيها الناس فإني قد وليت عليكم ولست بخيركم، فإن أحسنت فأعينوني، وإن أسأت فقوموني ....... الي اخر الخطبة.
