كالعادة ترجمت الكتاب وقريته في إطار الاستفادة منه كمرجع في أم الماجستير بتاعي

وكأغلب العادة برضه مخدتش منه جملة واحدة

والله أنا لو باخد فلوس ع الكتب اللي بترجمها دي كان زماني بقيت من الأثرياء وليا كتب مترجمة كتير في السوق باسممي ومشهورة بقى وبتاع 😁 بس للأسف كلها كتب حديثة تقع تحت طائلة حماية الملكية الفكرية ومحتاجة أذونات ومصاريف بالهبل قد كدة عشان تترجم :[

بس في المجمل هو كان مفيد ليا بشكل شخصي في التعرف على تطبيقات وهواجس استخدام الذكاء الاصطناعي في الصحافة، واللي بتنطبق في الحقيقة على كل أشكال الفنون والإبداع مش الصحافة بس

بدون الدخول في تفاصيل أكاديمية وبحثية معقدة لكن نقدر نقول إن ملخص الكتاب إن الذكاء الاصطناعي مش هيحل محل المبدعين وإنما اللي هيحل محلهم فعلاً هم الآلاتية اللي بيشرفوا على تركيب تفاصيل العملية الإبداعية

يعني بالنسبة للصحافة مثلاً فهم المحررين الصغيرين اللي بيجمعوا المعلومات للمحرر الأساسي اللي بيكتب المادة الصحفية في النهاية، دلوقتي الذكاء الاصطناعي يقدر يقوم بعملية البحث والتجميع بدالهم

أما بالنسبة لفكرة الكتابة بدل المبدع الأساسي فده في حقيقة الأمر غير مجدي تماماً لإنه بيستلزم مراجعة دقيقة بعده لعدم إمكانية الوثوق التام في مصداقية وفنية مخرجات الذكاء الاصطناعي، ده حتى غير إنها لو مظبوطة من الناحية العلمية والمصداقية والأخلاقية لكن الاعتماد من قبل كافة وسائل الإعلام مثلاً على الذكاء الاصطناعي هيخلي صوتهم كلهم زي بعض ومفيش فرق بين صحيفة والتانية أو قناة والتانية، وحتى في الوسيلة الواحدة هتبقى كل المقالات شبه بعض ومفيش تنوع، عشان كدة برضه لازم تتراجع من بشري يضيف عليها الصوت الخاص للوسيلة الإعلامية وصوته الخاص ككاتب للموضوع، والحقيقة ان التفاصيل دي ممكن تاخد وقت وجهد أكبر مما لو الكاتب كتب الموضوع بنفسه أصلاً

ونفس الشيء ينطبق على بقية مجالات الفنون والأعمال الإبداعية

ده غير إن العمليات دي كلها بتستلزم موارد مالية طائلة في ابتكار نماذج خاصة لكل وسيلة ومجال في الذكاء الاصطناعي تتناسب مع احتياجاتها وسياستها، وده بيخلي كتير من المؤسسات تستمر على النهج البشري الموجود أصلاً، وتحد استخدام الذكاء الاصطناعي في أضيق الحدود للنماذج الموجودة بالفعل من جوجل وميتا وشات جي بي تي ومتقدرش تتوسع في استخدامها بدون حد أو رابط؛ لإنهم معرضين طول الوقت للهلوسة والفهلوة وده طبعاً بيضر بمصداقية الوسيلة

ونفس الكلام برضه نقدر نطبقه على أي مجال فني أو أدبي، عشان كدة اللي يعرف يستخدم الذكاء الاصطناعي بشكل حقيقي في الفن والإبداع هو حد فنان أصلاً في المجال اللي بيستخدمه فيه، عشان هيحتاج يعدل على منتج الذكاء الاصطناعي بما يتوافق مع رؤيته وأسلوبه عشان يطلع المنتج النهائي وهيبقى بالنسبة له الذكاء الاصطناعي مجرد أداة بيستخدمها يسهل بيها على نفسه بعض الخطوات العملية اللي كانت هتاخد وقت أطول يدوياً

أما اللي معندهمش الملكة الإبداعية أصلاً وهيدخلوا يقولوا لبرامج الذكاء الاصطناعي هات لنا كذة بشكل كذة وباخدوها زي ما هي يقدموها ع انها شغلهم هيتفضحوا من أول لحظة من أي حد بيفهم في المجال ده

وبالنسبة للمجتمع المقلق من فكرة الاعتماد على الذكاء الاصطناعي كبديل للمنتج البشري الحقيقي؛ فكان فيه جملة في الكتاب عجبتني جداً في الحقيقة بتقول: "لم تكن البيتزا المجمدة نهاية مطاعم البيتزا. ولكن إذا كان مطعم البيتزا الذي أعمل فيه يُنتج منتجات رديئة، فمن المؤسف أن لديّ بيتزا مجمدة في ثلاجتي المنزلية، وهي تُباع بثلث السعر وتستغرق وقتًا أقل. ... إذا كان ChatGPT سيوفر البيتزا المجمدة، فمن الأفضل لوسائل الإعلام أن تُقدم التجربة والجودة والقيمة المضافة"

فده الواقع إن الذكاء الاصطناعي مش هيقضي على المنتج البشري بل على العكس ربما المنافسة اللي هيخلقها يخلي المنتج البشري الإبداعي يتطور أكتر لإن فعلاً اللي مش هيكون له مكان هو المنتج الرديء المعلب لإن ده اللي الذكاء الاصطناعي هيحل محله

وده هيطرح مشكلة جديدة تم التطرق ليها برضه في الكتاب من خلال جملة بتقول: "سيأتي وقتٌ يُتهم فيه المحتوى الحقيقي بأنه ذكاء اصطناعي، بينما هو حقيقي بالفعل، مما سيجعل الأمر صعبًا للغاية" بس ده هيبقى على المحتوى اللي مفيهوش روح وشبه أي محتوى تاني بالتالي هيبقى صعب التفريق بينه وبين الذكاء الاصطناعي، أما المحتوى اللي بياخد من روح وعقل كاتبه هيكون صعب التقليد وهيتعرف ع طول إن دي كتابة فلان أو فلانة، حتى محاولة تقليد الذكاء الاصطناعي لكتابات بعض الكتاب المشهورين بتبقى باينة لجمهور الكاتب المعني إن دي مش كتابته وإنما كتابة بتحاول تقلده، زي ما بعض الكتاب الصغيرين أحياناً أول ما بيبتدوا كتابة بيحاولوا يقلدوا الكتاب الكبار اللي بيتأثروا بيهم

طبعاً أنا هنا بضرب المثل طول الوقت بالكتابة أكتر لإنها مجالي ولإن الكتاب كان عن الصحافة برضه اللي أغلبها وأساسها الكتابة، لكن في النهاية الكلام ينطبق على كل المجالات الإبداعية برضه

#GENAIANDJOURNALISM

TOWARDSCOMMONPRINCIPLES By #UTSCentreforMediaTransition

#جولة_في_الكتب #كتب_أكاديمية

#سارة_الليثي