بص هوه بداية كلام كده الدراسة حاجة عظيمة جدا و فيها تقرب لله و ده مفيهوش نقاش و لا أنا جاي أتناقش في ده النهاردة.

بص بقى يا سيدي

و انت راجع مع أصحابك من على القهوة و متكيف قوي من اللعيب الحكاية اللي جابله جولين في الماتش، مسألتش نفسك هوه اللعيب ده عمل كده إزاي؟

يا عم انت هتقعد ترغي ما هو جاب الجولين و خلصنا، الفكرة اللي بتتريق عليها هيه في الواقع حاجة صعبة جدا، اللعيب ده بقاله ٣ أيام بيتمرن لوحده و بيتمرن مع زمايله و صاحي بدري مرهق من الماتش اللي قبله،و نظامه الغذائي قاسي، و عمال يسمع صحافه بتحفل عليه من هنا و جماهير بتحفل عليه من هناك، و تلاقي لعيب معاه في الفرقة منفسن منه، و المدرب كل ثانيه مركز على تمارينه و بيقيمه وسط زمايله، و في لعيبه أعلى منه في الدوري عماله تجيب في هاتريكات و شغل،و ساعات يلعب و ساعات دكه، و ساعات يرفعوه السما و مره وحده يقع متدشمل، و هوه بقاله فترة بيتدرب كل يوم، و مملش يوم مره، أصل الصراحه حاجه ممله و مرهقة إني كل يوم أتمرن و أنافس و أتحمل ضغوطات، و تيجي تقولي دي لعبه يا عم، هيه أه لعبة، بس كل ده مش سهل، و لما الدنيا تنفتحله قوي و يعمل موسم تاريخي، تلاقيه برده مفازش بأي جايزة، هل بقى كل اللي عمله و الالتزام الخرافي على مدار سنه ده بتسميه نجاح؟، هوه تفوق ذاتي في جزئية كلنا نقدر نتفوق فيها مره واحده على الأقل في حياتنا، بس مش نجاح، كلنا أكيد بلا استثناء فاكرين سنه واحده في حياتنا على الأقل كنا شاطرين جدا فيها، أو كان في ماده واحده كنت سوبر مان فيها، طب و باقي السنين يا معلم؟ ، يا عم ده نظام الدحيحه مش بتاعنا احنا الكلام ده، نعم!؟دحيحة إيه اللي بتقول عليهم،مش إنت يا معلم زهقت من اللي مقدّروش تفوقك في سنه و برده قالو عليك فاشل، مش انت برده اللي اتكيفت قوي من تفوقك في سنه و ركنت و اتكبرت و قلت هعرف ألم المنهج في السنة اللي بعدها ، مش إنت قلت على نفسك ذكي و تجيبها و هيه طايره و العيال التانيه دول بيحفرو في الرمل، أهلا بيك في المستقبل يا معلم، بعد كم سنه العيال اللي معاك بقو في حته تانيه، اللي دخل طب و اللي دخل هندسة و اللي دخل صيدلة، و باقي الكليات على راسنا و الأرزاق بإيد ربنا طبعا، بس انت فين دلوقتي، 🗣️أصل العيال دي محظوظة و مرزقة و أنا أنجح و أحسن منهم، لا هما مش محظوظين يا معلم، هما قدرو يعملو اللي انت مرضتش تعمله، هما سابوهم من كل الهري اللي في دماغك ده و ضغوطات حياتهم و قالو إيه المشكلة نكرر اللي عملناه تاني، مش جايز تظبط؟ مش جايز نجاحنا يتقدر فعلا؟، نرجع بقى للعيب الحكايه، اللعيب ده بعد الموسم الخرافي اللي قدمه، دخل الموسم التاني محبط من إنه محققش و لا جايزة، زعلان إنه بيتقال عليه لاعب الموسم الواحد، فمرضيش يكرر اللي عمله، و لعيب تاني برده نسخة تانية منه بالظبط، بس قال أنا موهوب و فنان و أجيب الجول و أنا مغمض و مش محتاج أتمرن و في الاخر مستواه انهار، و لعيب تالت بقى نسخه منهم هما الاتنين بالظبط، بس قال مفيش مشكلة أكرر اللي عملته تاني، فيها إيه لما أحاول بدل المره عشرة، مش جايز آخد الكرة الذهبية، و بياخدها في الأخر، و تلاقي الجماهير تقول عليه ده لعيب موهوب جدا و من طراز عالمي، لا يا صاحبي هوه مش موهوب، و لا صحابك محظوظين و مرزقين، هما بس عرفو يحافظو على تفوقهم لغاية ما بقى اسمه "نجاح"، مش تفوقو مره و قالو ده نجاح ، الغريب بقى إن في الحالتين دي كورة⚽ و دي دراسة✍️، بس قواعد النجاح ثابته، ثابته من أول جيم البلايستيشن مع صحابك لغاية العالِم اللي خد نوبل، القواعد ثابته، بس الإرادات و الهمم هيه اللي مختلفة.

-عشان كده إبقى ركز قوي في مقولة

"الأصعب من أن تنجح هو أن تحافظ على ذلك النجاح"

صحيح لسه مجاوبتنيش،الدراسة✍️ولاه الكورة⚽؟

كُتِب بقلم أسامة أيمن سليم