فِي نظرية بتقول " كُلنا بنتغير ومفيش في الحياة ثوابت" وعلىٰ النقيضِ بقول فِي أُصول حتمية لابُد مِن وجودها فِي حياتنا، فِي قاموس تعاملنا مع البشر..

ولو جزمنا بِصحة هذا الكلام هأكدلك إن مفيش حاجة ثابتة وإن رؤيتي لموضوع ما ممكن تتغير مع الوقت، وإن كُل الكلام ده مفيش دليل صحيح علىٰ إثباته..

نخرج شوية مِنْ الفلسفات النمطية ونحرر نفسنا مِنْ عقدة الإكتئاب ونركن كُتب عِلم النفس علىٰ أقرب رّف، ونرجع شوية لِكلام ربنا وندور علىٰ الحلول اللي بترضي قلوبنا وتشبع رغبات العقل البشري..

هَتمسك صورة قديمة خَزِنها عقلك في صندوق الذكريات، وهتأكدلك إن وجودك معدوم وإن الحل فِي موتك أو في غيابك أو شوية إنعزال غير صحي !شبه مُنعزل بتراقب وتشوف وإنتَ مكانك،

_فين وجودك؟!

=لا معلش أنا دلوقتي مُنعزل مش هقدر أكون فعّال معاكم !!

حتميتة لّحظة الإنعزال الصحي "مِن وجهة نظري" ترتيب وفلترة بدون شوائب أو مؤثرات مِن غير مُراقبة ! أظن المعنى وصل !

إهرب بنفسك لِلواحد الأحد"اللّه" إنعزال صحي والعائد منه طاقة وقوة وترتيب صحي لكل اللي جوانا..

كده أقدر أقول أنا مُنعزل ومش محتاجة حد يقرب مني، ليه ؟! لاني ببساطة أنا دخلت في حِصن متين هخرجه منه بعائد ملموس فِي حياتي وفي تعاملاتي ..

نرجع بقا لِنقطة " معلش يا فاطمة أنا في مرحلة معنديش طاقة أرد أو أشرح لحد أنا بمر بـ إي"

_طيب أنت دلوقتي مُنعزل داخل الحصن المتيّن ؟!

=بصراحة, لا

_طيب بتعمل إي

=مش بعمل حاجة، بفتكر كُل الحاجات اللي حصلت من ساعة ما بدأت أدخل دايرة الحياة البشرية وأمسك في كل حاجة نكدت عليا وأقعد أعيط !

طاقة، وقت، تدهور في الصحة، فلترة ناس ملهاش إي ذنب، ده كله تحت مسمى "أنا مُنعزل"

ونرجع تاني لدايرة القوة المزيفة اللي هي أصلاً غلط !

_ده أنا قوية يا بنتي

=الله قوليلي طيب ازاي ده أنا كمان عايزة ابقى قوية؟!

_ده أنا بكون هموت من التعب النفسي وقلبي بيتعصر وبخرج وبقعد وبتكلم وبضحك "ضحكة مُزيفة"

=هي دي من وجهة نظرك قوة ؟! أنتي كده بتخاطري بسلامك النفسي وبتمثلي إنك قوية ؟! أحب أقولك إنك كده غلطانة

صدمتك ؟!

نرجع للواقع بقا، إي المانع إننا ندور علىٰ حل ؟! نقعد نحكي لحد يمكن يلفت نظرنا لِبداية خيط مِنْ خلاله يمكن نلاقي حل !

أنا مش ضدّ العُزلة، أنا ضدّ الطريقة اللي بنتعامل بيها مع نفسنا، انا ضدّ العشوائية في التعامل مع مشكلة نفسية بتواجهنا، أن ضدّ الإنحياز لِجلد الذات..

نفوق بقا ونفرق بين العُزلة وبين العقاب وجلد الذات..نخرج من دايرة القوة المزيفة اللي من خلالها بيضيع علينا الإستمتاع الحقيقي بالإشياء، العمر مرة، وربنا خلق السبب والمسبب، يبقى قدامنا الحل وبنتغاضى ليه ؟!

وقت مع النفس، وقت نطبطب مش نجلد، حكمة في آية، نتخلى شوية عن هوامش الحلول وندخل بقوة الحصن المتين الصحي اللي من خلاله هنوصل للسلام..

_من الأول؟!

=من الأول ♥️

#فاطمة_شجيع

#مقدسية👯