الحب حلو…
بس مش بهالشكل اللي الناس عم تعملُه.
الحب مش صور تنبعت،
ولا مكالمات بالخفاء،
ولا “بس خليني أشوفك” تحت ألف حجة.
شو بتستفيدوا — شباب أو حتى بنات —
لما تبعثوا صوركم؟
شو القيمة اللي عم تضيفوها لحالكم؟
وليش بنت محجبة ترضى تبعث صورتها بدون حجاب
لشخص مش من حقه يشوفها؟
اللي بطلب صورة اليوم،
بكرة بطلب أكتر.
واللي بيتسلى اليوم،
بكرة بيدوّر على غيرك.
ما أحلى إنّه ييجي رجل قدّام الناس،
من الباب،
يطلبك بالحلال،
وإنتِ رافعة راسك،
نظيفة،
محافظة على حالك،
ولا حدا كان واصل لخصوصيتك.
الحياء مش ضعف.
والحدود مش تعقيد.
والبنت اللي بتحافظ على حالها مش قديمة…
هي نادرة.
أنا يمكن صغيرة بالعمر،
بس شفت بعمر العشر سنين أشياء
كسرت براءة ناس غيري.
ومن يومها قررت:
ما أكون لعبة،
ولا صورة عند حدا،
ولا ذكرى عابرة في موبايل شخص ما بستاهلني.
الحب الحقيقي ما بيبدأ بصورة.
بيبدأ باحترام.
وبيكمل بوضوح.
وبيوصل لبيت مش لمحادثة مخفية.
الحب حلو…
بس للي بعرف قيمته،
مش للي بده يستهلكه.
اسمعيني منيح:
قوتك مش إنك تهاجمي الناس.
قوتك إنك ثابتة حتى لو الكل حواليك ماشي بعكسك.
واللي بده نظيفة… لازم يكون هو كمان نظيف.
غير هيك؟ لا تضحي بمبادئك عشان كلمة “بحبك”.
التعليقات