في ليلة من ليالي الامتحانات الحافلة بالتوتر و السهر و الكثير من الكافيين اللي بيشتغل عكس المطلوب منه ، كنت بذاكر لمادة صعبة جدا
و للاسف مكنش ادائي فيها هو اللي كنت متوقعه ؟
قلت خلاص هعوض في الشفوي
ولكن النتيجة كانت أسوأ 🥲
ولا تتخيل يا صديقي كمية البؤس و الحزن اللي كانوا مسيطرين عليا
و رغم إن كان عندي مادة صعبة بعدها بيوم علطول الا ان مكنش عندي اي طاقة للمذاكرة
زي ما تقول كده طاقتي خلصت من كتر الحزن
🟢فخدت قرار جريئ شوية في الفترة المحتدمة بالامتحانات وهو اني انزل الجيم 🤯
رغم علمي بالالم الجسدي اللي انا مستنيه واني هروح انام بس كده كده انا مكنتش هذاكر
و للمفاجأة اللي عمري ما خدت بالي منها إني طلعت مرتاح نفسيا و عندي إقبال إني اذاكر او اعمل اي حاجة
بعد ما ادائي الوحش في الامتحان افقدني الشغف بكل
حاجة
لأول مرة في حياتي اخد بالي إن الجيم مش مجرد للمحافظة على الصحة الجسدية و اللياقة و الكلام المهم الجميل ده
لا ده ليه أهمية اكبر بكتير وهو بإختصار تظبيط المود
ملقتش حاجة بتخرج الواحد من المود الوحش او الكآبة اللي هو فيها زي الجيم
في وجود حاجات كتير زي المخدرات او غيرها من الوسائل اللي بيهرب ليها الإنسان و بتضره و تزود كآبته كان الجيم و سيظل افضل بديل على الإطلاق
كتير مننا بيتعرضوا لظروف زي دي كتير و بشكل شبه يومي
و كتير مننا بردو بيفرطوا في حق نفسهم في انهم يريحوها شوية من التعب و الألم و الحزن ده و شايفين إن الرياضة رفاهية وقت الفراغ بس او مضيعة للوقت 🙄
احب اقلك لا يا صديقي 🤚‼️
الرياضة لازم تكون جزء اساسي في يومك لأنها تعتبر علاج لكتير من الأمراض النفسية .
مش بس كده ده كمان واقي ليك من ان الأمراض دي تكبر و تحتاج لتدخل متخصص لا سمح الله بعد الشر عليك يا صديقي 😊
تجربة انصح بيها و اشجع عليها اي حد مر بظروف مماثلة
ف بكل اختصار
متفرطش في حق نفسك و انزل الجيم
-------------
ده تقريبا اول مقال اكتبه في حياتي اتمنى من زملائي تقييم جميل زيهم علشان اعرف اطور من نفسي و شكرا مقدما 🙃