هو أليكس هورموزي فعلاً ولع الدنيا ولا كل الحوار شوية حركات تسويق رهيبة وذكية وملعوبة؟
هو طلع من كام يوم عمل لايف والدنيا اتقلبت! و الناس كلها بتقول إنه لم 150 مليون دولار في يوم واحد بس مفيش دليل فعلي على الرقم دا! فيه ناس قالت باع ٣ مليون نسخة من برنامج بـ ٦ آلاف دولار!
الحقيقة؟ محدش عارف الرقم
لكن اللي يهمنا هنا مش الرقم، اللي يهمنا الخطة اللي استخدمها عشان يعمل رقم كدا
الراجل دا قدم درس عملي واضح وصريح في إزاي تخلق طلب قبل ما تبيع
طاب هو عمل ايه ؟ شوية خطوات هقولهالك بسرعه عشان وقتك ووقت الجمهور ..
١- وزع ببلاش قبل ما يبيع ( ادي قيمة ببلاش قبل ما تطلب حاجة )
اه بالظبط كدا هو وزع كتب وكورسات وتمبلتس وفيديوهات وكله كله مجاني ببلااااش يا معلم
فالناس لما تشوفك بتدي من غير مقابل بتحب تردلك الجميل او بتثق فيك وبتبقى عارفه انك يوم ما هتحط سعر يبقى انت بتقدم قيمة اكبر.
٢- لعب على عامل الوقت وانه يتلحق يا متلحقش (وهو عمل سبب حقيقي ان العميل يشتري دلوقتي مش بعدين)
فالعرض مش مفتوح على طول فترة قصيرة بس يعني مش مستمر! يعني مش ممكن تستني وتشتري لما المرتب ينزل! وده خلى الناس تحس إنها لازم تلحق.
٣- خلى العرض مغري بشكل غبي متخلف (اعمل العرض بشكل يخلي الزبون يحس إنه غبي لو ما اشتراش)
مش مجرد منتج وخلاص لا دا باكدج متكامل (مجتمع + موارد + ضمانات + إضافات او بونص وهداية)
فاللي يخلي السعر مقارنة بالقيمة = حاجة مستفزة وانا كعميل لازم اشتريها والا ابقى خاين وعبيط يعني متامر واهبل.
٤- احكى قصة أكبر من المنتج نفسه ( اربط منتجك برسالة أو حلم كبير الناس تحب تكون جزء منه)
الموضوع مش اشتري مني وبس الموضوع حركة: دعم رواد أعمال، مشاركة رحلة، صناعة ثروة من العطاء دا! الموضوع رؤية شامله زي رؤية ٢٠٣٠ كدا اللي بقيت كل الشركات بتساهم فيها وبتعلن دا عشان العميل يحس انه جزء من العطاء والتقدم دا.
٥- غرق الدنيا إثباتات (اجمع قصص نجاح وأرقام حقيقية واعرضها وكيس ستاديس وسكرينات وريفيوهات واديلو ادي)
لان اراء وشهادة العملاء والأرقام والنتائج حقيقية هي اللي بتخلي اي شك يتبخر والدنيا تصبح وردي كلون عينيها في قارعة النهار.
٦- هو خلى الدعاية عنهم مش عنه (راجع رسالتك كدا في الدعاية! انت بتتكلم عن نفسك ولا عن العميل؟)
الراجل دا محتواه دايمًا مركز على (انت هتكسب إيه) مش هو عمل إيه ولا ازاي اختراعه دا فاجر! عشان كده الناس هجمت على منتجه.
في النهاية يا عزيزي احب اقولك انت مش محتاج ملايين المتابعين عشان تطبق الخطة دي ولا مئات العملاء بالعكس لو عندك 100 شخص بس
إدّي قيمة مجنونة
اعمل إلحاح وندرة
قدم عرض مستفز
اعرض دليل وأرقام
خليك جزء من رؤية أكبر
ده هو البلاي بوك اللي ممكن يحوّل لايف واحد لـ ١٥٠ مليون دولار واكثر
السؤال المهم بقا .. إنت إزاي ممكن تطبق الخطة دي في البزنس بتاعك؟
لو مش عارف تبدأ ازاي او تجربها ازي كلمني وخلينا نجرب سوا ولو حققت رقم هورموزي انا هاخد ٢٠ الف منه بس وحلال عليك ال١٣٠ الف .. ههه
شارك المقال لو حسيت انك استفدت ولو محسيتش شاركه برضو ممكن حد يحس ويستفيد
التعليقات