خلاص بنودع 2019 وداخلين ع سنة جديدة وكله بدأ يحط أهدافه وأمنياته اللي غالباً بيكتشف بعد مرور شهر أو أتنين إن الأهداف دي كبيرة عليه ومعندوش الدافع اللي يخليه يلتزم بيها فبالتالي بتكون النتيجة في النهاية مُحبطة. وهكذا الوضع ده تقريباً بيتكرر بالميللي كل سنة ومش قادرين نلاقي حل!
فدول شوية نصايح كده جايز يساعدوك تبتدي السنة بشكل أفضل:
1- حدد أولوياتك.
أكيد إنت عايز تتعلم لغة، وعايز تكتسب مهارات، وعايز تلاقي وظيفة، وعايز وعايز وعايز... الفكرة هي إنت دلوقت في اللحظة الحالية أو في الـ 365 يوم الجايين دول عايز إيه بالتحديد؟.. إيه الحاجة اللي لازم تبدأ بيها فوراً وتركز وقتك وجهدك ليها؟
إجابتك ع السؤال ده هتوفر عليك كتير جداً وهتخليك تحدد بداية الطريق وخط السير الكامل.
اختار هدف واحد بس تركز عليه السنادي، وليكن إنك تحسن مستواك في الإنجلش، تمام.. حددت الهدف الأهم، ابدأ حط خطة إزاي تحقق الهدف ده خلال السنة.
2- اتعلم إزاي تتعلم.
بمعنى إنك تطور من نفسك عن طريق البحث والاطلاع ومعرفة كل الطرق لتحقيق هدفك، يعني مثلاً قبل ما تحدد هدفك الأساسي. لازم تتعلم أصلاً إزاي تحدد هدفك وإيه الشروط والأساليب، وده بتعرفه عن طريق جوجل.. ابحث عن طرق وضع الأهداف وإيه هي الأهداف الذكية وإيه المباديء والاستراتيجيات. لازم تتعلم مهارة البحث والاطلاع ع المعرفة.
3- نظف شبكاتك الاجتماعية.
خد خطوة في محاولة استغلال وقتك بشكل مفيد، مش بقولك احذف الفيس ولا يوتيوب لإن ده صعب، لكن ع الأقل ابدأ بخطوة بسيطة وهي إنك تخصص جزء من وقتك اعمل فلترة لكل الأكونتس بتاعتك، احذف كل الأصدقاء والصفحات اللي بتستهلك وقتك وعقلك.
ألغي قنوات اليوتيوب اللي مش بتفيدك وسيب القنوات المهمة وتابعها بشكل يومي.
ألغي الأصدقاء اللي بتدفعك آرائهم للنقاش والتعصب والضغط، إنت مش مستفيد أي حاجة من كل ده!
4- اعمل ع بناء العادات.
وعشان تفهم النصيحة دي أنصحك بقراءة كتاب قوة العادات.. أكيد عندك عادات سيئة عايز تتخلص منها بس مش عارف، والعكس قدامك عادات كويسة جداً وهتفيدك سواء في شغلك أو في حياتك بش مش عارف تكتسبها. لازم تفهم إزاي العادة بتتكون وإيه الطريقة اللي تقدر تكتسب بيها العادة أو تتخلص منها، فيعني مع بداية السنة خلي أول عمل ليك إن تجيب الكتاب ده وتقراه.
5- لازم تصحى بدري.
من ضمن العادات اللي لازم تكتسبها وتحاول فيها مهما فشلت هي إنك تصحى بدري، ومش هتكلم كتير عن فوايد الصحيان بدري.. إذا مكنتش إنت عارفها أصلاً فدي نفسها مشكلة أكبر!
6- ممارسة الرياضة.
مجرد ما بتسمع أو تقرأ ممارسة الرياضة أول حاجة بتيجي في بالك هي "الچيم" فتلقائياً عقلك بيقولك لأ كنسل النصيحة دي عشان محتاجة وقت وفلوس وحوار طويل!
ممارسة الرياضة مش مُقتصرة ع الچيم والتمارين الصعبة، إنت لو كل يوم الصبح خرجت من بيتك اتمشيت نص ساعة حوالين المنطقة بتاعتك إنت كده مارست الرياضة. لو بعد ما قمت من النوم قعدت نص ساعة عملتلك عشرة ضغط وعشرة عُقلة إنت كده مارست رياضة!
متصعبش الموضوع ع نفسك، ابدأ بأي طريقة ومتستهونش بالبساطة.
7- فلاش باك.
السنة اللي فاتت أكيد في بدايتها إنت كنت حاطط أهداف برضه ومحققتش حاجة منها والسنة خلصت، لازم تعمل فلاش باك عشان تدور ع الأسباب اللي منعتك من تحقيق الأهداف اللي كنت محددها.
هل السبب هو إنك قصّرت وملتزمتش أو مكنتش مهتم أصلاً تحقق أهدافك ولا لأ؟
هل السبب هو ظرف طاريء منعك من تحقيق الأهداف دي؟
هل السبب هو إنك مشيت في طريق غلط وحطيت خطة مش صح عشان تحقق أهدافك؟
طب هل إنت محققتش أي جزء خالص ولو بسيط، ولا حققت نسبة قليلة فيبقى ده دليل ع إنك كنت ماشي صح بس كنت محتاج تعمل تعديل بسيط؟
فهمت المقصود إيه؟.. إنت أدرى بحالك وظروفك، اقعد وشوف إيه اللي خلاك معرفتش تحقق أهدافك عشان تاخد بالك بقى في السنة الجديدة.
8- اتخلص من السلبية.
اتخلص من السلبية سواء إنت نفسك مصدر السلبية أو اللي حواليك هما مصدرها. كلامك لنفسك وعن نفسك بيفرق جداً وبناءاً عليه عقلك بيتعامل معاك، بلاش تفتخر بفشلك وتقعد تتريق وتعمل كوميكس ع نفسك وتنزلها ع الفيس بحجة إنك بتهزر، إنت بتهزر أه بس عقلك غشيم مبيهزرش، بناءاً ع اللي إنت بتعمله ده بيقوم هو يزرع جواك فكرة إنك فعلاً فاشل وإنك مش بتهزر!.. فخلي بالك!
9- جرب حاجة جديدة.
اخرج من حالة الملل والتكرار اللي دايماً بتشتكي منها ودايماً زعلان إن أيامك كلها شبه بعض وروتين حياتك ممل. دور ع أي حاجة جديدة واعملها. يا سيدي خد عندك:
روح مع صحابك في سهرة ليلية كده ع النيل أو جرب تصطاد.
جرب تزرع أي زرع فوق السطح عندك.
خد نفسك وانزل اتمشى، اتمشى بس كده بدون أي هدف أو تحديد مكان معين عايز تروحه.
زور أي دار أيتام قريب منك واقعد مع الأطفال وألعب معاهم.
جرب تتفرج ع فيديوهات DIY وطبقها.
اتغلب ع الخجل والكسوف، وابدأ افتح كلام مع ناس متعرفهمش.
فيه حاجات كتير جداً جديدة عليك وعمرك ما عملتها قبل كده، جرب اعملها واستكشف نفسك كده واعرف إزاي تتعامل وتتواصل مع اللي حواليك، اخرج من القمقم!
10- اهتم بعلاقتك مع ربنا.
مش هقعد أقول إكليشيهيات في النقطة دي، لكن باختصار إنت في رحلة مؤقتة. يوماً ما هتمشي وهتوصل لنقطة النهاية والدنيا من بعدك هتستمر عادي وهتكمّل كما لو إنك مكنتش موجود أصلاً "تُنسى كأنك لم تكن". زائد إنك منتاش ضامن عمرك وفي أي وقت وفي أي مكان إنت مش ضامن حتى خطوة واحدة تخطيها.
فخلي علاقتك مع ربنا كويسة، التزم بالصلاة والدعاء والتوبة بعد كل ذنب ومعصية، اغلط بس ارجع بسرعة. متخليش السكّينة تسرقك!
وافتكر إنك مش مطلوب منك غير إنك تحاول واستمتع بالمحاولة واستمتع بالطريق والرحلة بدل منتا كل همّك في الوصول، ومتحطش توقعات عالية.. خليك واقعي.
إن شاء الله تكون سنة 2020 نقطة تحول في حياتكم وتبقى وش الخير عليكم.. كل سنة وإنتو طيبين.
التعليقات