لاكن قبل ما أعمل كده، سيبت ليكى المذكرات دى، وعلى فكرة أنا مش ندمان.
هوووووووف امممم ابدأ ازاى!!
يمكن كانت البداية فى الصدفة، لما لاقيتنى توهت وأنا رايح بالعجلة فى أول يوم، واللى يسأل ميتوهش بس هسأل مين أنا فرملت لما وصلت لنهاية الطريق،
والطريق بقا 3 طرق ضيقة جداً، ازاى كده.
جلال قالى خليك ماسك طريق كفر النصارى علطول حوالى تلت ساعة بالظبط وهتلاقى نفسك قدام المصنع، طيب فين المصنع الساعة دلوقتى 2 إلاّ ربع وانا خارج من البيت وحدة ونص، يعنى تقريباً ربع ساعة بالظبط، انا كدة مش هلحق وردية الساعة تلاتة ودا أول يوم، أنا غلطان كنت جيت مع ابن خالى هو برضوا وردية 3 ، بس انا مبكلموش هروح اقوله كده من سكات خدنى معاك، هو اللى غلط فيا الأول عيوطة كلمة تزعل وخصوصا قدام العيال.
مش مشكلة أنا هرجع، وأبقى اخد جلال ورايا بكرة على العجلة اودية وردية الصبح وبالمرة أعرف أنهى طريق فى التلاتة اللى بيودى عالمصنع، بس غريبة يعنى ألا محدش خالص فى المكان، بس غريبة إيه يابو ياعلوة دى الساعة اتنين بعد الضهر هو فى حد فى الأراضى دى فى عز الولعة دى، أنا ابتديت أخاف من السكوت دا الحتة كلها اراضى مزروعة ومفيش ألا العشة اللى قدامى دى، طب ما أروح ابص كده يمكن يكون فيها حد واهو اليوم ميضيعش عليا اسأله المصنع منين وأروح.
نزلت من على العجلة وركنتها على السنادة، محدش هياخدها هو فى حد أصلا هنا ومشيت فى الطريق التالت شمال بينى وبين العشة حوالى 70 متر، الطريق كله طوب قلاقيل والمشى عليه صعب، ومشيت للعشة وبقرب منها ولسه مش شايف أى حركة أو أي صوت بيقول إن فيه حد، فجأة كلب هوهو من بعيد ناحية اليمين، دا أول صوت أسمعه فى المكان الساكت دا، كان كلب بعيد شكله شافنى ف بيهوهو عليا، طنشته وبصيت قدامى تانى فجأة لاقيت حد طويل جدا واقف هناك جنب العشة، اطول منها يمكن بمرتين، اترعبت واتمسمرت مكانى مش قادر أنطق ولا أتحرك، شعره طويل ولابس جلابية سوده وشه اسود، مش عارف هو واحد ولا وحده، أنا صرخت ولفيت وجريت، جريت وسبت العجلة مش قادر اخد نفسى، جريت بسرعة فى نفس الطريق اللى جيت منه، جريت لحد ما انقطع نفسى ولا بصيت ورايا لحظة، جريت وجريت وجبت اخرى وهقع مش قادر اخد نفسى ولسه بجرى مش هوقف اجرى لحد ما اوصل للبيوت، سمعت صوت عربية حديد من اللى بيجرها الحصان الصوت جاى من ورايا بعيد وبيعلى وحده وحده، خايف ابص ورايا، حاولت أسرع أكتر مش قادر نفسى انقطع اترميت على الأرض وأنا باخد النفس بصعوبة وقلبى هيتخلع من مكانه وعينى بتدمع من الرعب، لفيت براسى لمحت العربية بالحصان حد بيقول ياساتر يارب مالك يابنى بتجرى ليه من بعيد، اترفعت من ع الأرض حد شالنى ، الصوت بقا مش مفهوم وودانى بتصفر والصفير بيعلى الملامح باهته والدنيا بتضلم مع تقفيلة عينى ومش حاسس بالدنيا حواليا.
ضلمه مش عارف انا صاحى ولا بحلم
"لنا الله ياشيخ عوض، والله ما عارف اعمل ايه"
دا صوت أبويا اه اه دا صوته هو أنا فين انا فى البيت؟
"يابو على قول الحمدلله، ربك كبير بس انت قول يارب"
الشيخ عوض،أبويا والشيخ عوض طب إحنا فين انا مش شايف حاجه.
"شرفت ياشيخنا"
نور خفيف باهت، وبيشتد
"ربنا يقومهولك بالسلامة، انا هعدى المغرب أقرأ واتطمن عليه"
دا سقف الأوضة أنا فى البيت، أنا فى البيت انا فى البيت، بحاول اتكلم مش قادر،جسمى تقيل ونفسى بيتقل، افتكرت أنا شوفت عفريت عند العشة، شكله مش مفارقنى أسود عينه بالطول سودة وشه طويل حاسه قاعد على صدرى، عاوز اتكلم مش قادر، النفس بيروح بترعش ودماغى هتتفرتك بتزن، عتمة سواد فى سواد،فى إيد بتتحرك على وشى، الصوت مش واضح الايد بتتحرك على وشى، مش فاهم الصوت،صوت واطى " اعوذ بالله من الشيطان الرجيم، قوم ياعلى قوم يابنى، اعوذ بالله من الشيطان الرجيم"
دى أمى،فتحت عينى أمى مسندانى ووخدانى فى حضنها، بصيتلها قولتلها أمى وأنا ببكى وحضنتها
" على، على الحمدلله ألف شكر ليك يارب"
ابويا دخل الاوضة جرى " على فاق يما"
وسجد فى الأرض وهو بيبكى "الحمدلله، اللهم لك الحمد، اللهم لك الحمد"
ستى جت واستلمتنى من امى فى حضنها " مالك ياحبيبى، إيه اللى حصل ياضنايا، اعوذ بالله من الشيطان الرجيم، اعوذ بالله من الشيطان الرجيم"
»أمى
" أنا هقوم أجيبله ياكل، دا بقاله يومين مداقهوش"
" أنا هطمن الشيخ عوض يطمن أهل البلد واجى يما"
»ابويا
" استنا ع الواد يبنى ياخد نفسه، دا لسه فايق"
»ستى
لأ هات الشيخ عوض يابا، انا عاوز احكيله.
تحكيله إيه ياعلى، إيه اللى حصل يابنى؟
"يامحمد مش وقته، دا الواد لسه فايق، لما ياكل لقمه، امك هتيجيب الاكل، كلك لقمة يابنى واصلب طولك، والشيخ مش هيطير أهو فى الجامع"
امى دخلت بصانية الأكل " قوم ياعلى رم عضمك بالبطة دى، انا مسوياها ومجهزاهالك، قلبى كان حاسس إنك هتقوم النهاردة ياحبيبى"
" كل ياعلى وقوم اتشطف، باقى ع المغرب ساعة هنصلى ونقعد مع الشيخ عوض"
»»» دى تجربة رقم زيرو 🙃
كتاب عصر القرود .. مصطفى محمود