خلى الصلاة عادة تجيب سعادة :)

مش من عادتى انى اتكلم ف الدين او اقول اى نصايح من اى نوع خصوصا لو حاجه مش مؤهلة اتكلم فيها زى الدين بس فيه موضوع شدنى اتكلم فيه.

بما إننا شباب وبناخد اغلب آرائنا وأفكارنا من ال social media امبارح شوفت بوست على facebook بيتكلم عن

ازاى اخشع ف الصلاة ؟؟

ولقيت comments كتير استوقفى كام comment شدونى جدا قريتهم بتمعن لدرجة انى تقريبا حفظت الكلام... ومن بعدها وانا كل ما اصلى بركز ف الصلاة وبحاول اخشع فيها واحس بيها على قد ما اقدر لإني زى الاغلبية بصلى بسرعة ومش بركز فيها بالدرجة الكافية... بس حقيقى الموضوع يستاهل احنا بنستسهل الركعتين اللى بنصليهم قبل اى حاجه مهمة هنعملها او بمعنى اصح " بنكروتهم " ومش بناخد بالنا ان كل ما نحس بالصلاة وبالكلام اللى بنقوله فيها بنحس براحة كبيرة ومن عند ربنا بتتفك عقد حياتنا.

ومن العادات اللى بتمنى اواظب عليها صلاة العشاء قبل النوم بتدى احساس حلو يخليك تنام مطمن ومرتاح وكمان لو لحظة تجلى زى دى تدعى ربنا وتتذلل ليه عشان يستجيب دعائك انشاءالله هيستجيب.

حقيقى الصلاة غير انها فرض واول حاجه هنتحاسب عليها بس بتريح وبتديك طاقة كبيرة تخليك تبدع وتطلع احلى شغل ومثال حى انى بكتب الخاطرة دى بعد ما صليت العشاء وحاسة انى ممكن اكون كتبت حاجة حلوة تقروها وتفرق معاكو.

الصلاة مش بس عبادة دى حبل رابط بينك وبين ربنا اوعى تقطعه !!