دمك خفيف يا مامي 😄!!

"بيقولوا إن الحامل دمها تقيل " !😅

صحيح الجملة الشهيرة دي ؟!!

في الحقيقة ، الحامل دي أجمل ست في الدنيا و أخف دم على فكره 😄

و الموضوع في المجمل له علاقة بالشخصية و الظروف المحيطة .

لكن في الحمل بالذات ، الست غصب عنها ممكن تحس بشوية ضيق ، اكتئاب ، توتر ، عدم الرغبة في الانخراط المجتمعي ، ده غير بقى شوية الكسل و العزلة ..

في الحقيقة كل ده بيحصل غصب عنها ، فحقيقي فترة الحمل صعبة جدا ، بيحصل فيها تغيرات هرمونية بتأثر على مزاج الحامل ، ده غير آلام الحمل المتنوعة ما بين صداع و غثيان و تقلصات و حركات البيبي و تغيرات الوزن و الأنيميا و غيره كتير من تغيرات الحمل .

و أول ما هتبقي حامل ، هتلاقي الجميع بينهال عليكي بالمأكولات و المشروبات و نصايح الراحة و انك تقعدي في السرير و متشيليش حاجات تقيله 😅

و قليل جدا اللي هياخد باله من الاهتمام بالصحة العقليه التي لا تقل أهمية عن الصحة الجسدية ليكي و للجنين ..

طيب تعرفي انك لو حاولتي تضحكي عالأقل ١٠ دقايق كل يوم ، هتبقي انت و طفلك في مكان تاني خالص نفسيا و جسديا و هتعدي فترة الحمل بأقل معاناه ☺

خاصة لو عرفتي ان الطفل بيتأثر بيكي جدا مش بس في مرحلة الطفولة و لا بعد الولادة ، لكن من و هو لسه جنين !!

بيحس امتى انت خايفه أو متوترة ، عشان كده مهم جدا انك تاخدي بالك من صحتك النفسية و تبقي مبسوطة عشان طفلك يطلع مبسوط و مبهج😄

تعالي نشوف سوا ، شوية ضحك كل يوم ممكن يعمل إيه ليكي و للبيبي و لكل اللي حوليكي ☺ :-

** الضحك بيقلل اكتئاب الحمل بكل فتراته و أشكاله الناتج عن التغيرات الهرمونيه في الحمل و بيرفع الحالة المزاجية في دقايق !

** الضحك بيقلل من مستويات الإجهاد و القلق النفسي و الجسدي و الشعور بالتوتر و بالتالي بيحميكي من احتماليات الولادة المبكرة أو نقص وزن الطفل او التأثير بالسلب على تطور مخه و سلوكه فيما بعد ..

** الضحك بيساعد على تطور الجنين بشكل كبير و بيزود من حركته و نشاطه ،، تعرفي فيه حركة بيعملها دكاترة كتير إنهم بيخلوكي تضحكي جامد أثناء السونار و تشوفي ساعتها تفاعل البيبي و حركته أثناء ضحكك سبحان الله !!

** الضحك بيزود المناعة اللي بتقل أثناء الحمل ، و بالتالي بيقلل من معدلات العدوى و يقلل من فرص حدوث ولادة المبكرة ..

** الضحك بيساعد على تطور الجهاز العصبي للجنين و بيساعد على نمو و تطور المخ و مراكز الشعور و تطور الذكاء و بيساعد على تكوين المزيد من خلايا المخ لديه بشكل صحي

** الضحك بيساعد على إفراز مضادات الألم الطبيعية في الدماغ ، و بالتالي بيقلل من العديد من الآلام المصاحبة للحمل زي دوار الحمل و التقلصات و الصداع و الغثيان ..

** الضحك هيفتح نفسك عالأكل و هيخليكي تشربي اللبن و تأكلي الأكل الصحي اللي مش بتحبيه 😅 ، بس ناكل بالراحه عشان مش عاوزين نزيد كتير قي الوزن 😅

** الضحك هيساعد في خفض ضغط الدم و بالتالي هيحميكي من الإصابة بتسمم الحمل و مضاعفاته زي الولادة المبكرة او الاضطرار للولادة القيصرية ..

**الضحك بيساعد على تنظيم ضربات القلب بشكل جيد

** الضحك هيساعد على الحفاظ على معدلات نمو الجنين و بالتالي هيحميه من نقص الوزن

** الضحك بيساعد على تطور عواطف الجنين و حركته

** هيزود الارتباط بينك و بين ابنك ، لان الابن من و هو لسه جنين ، من و هو لسه في الرحم ، هو انعكاس ليكي زي ما قلنا و كل هدوء بتحسي بيه و ضحك بتضحكيه هيأثر جدا بالإيجاب عليه  

و على فكرة ، الضحك بشدة مش هيضرك في حاجة زي ما بتسمعي ، بس أهم حاجه و انت بتضحكي جامد و منهمكه فيه تاخدي بالك أحسن تقعي من مكانك واقعه جامده بس 😅😅

و مش هوصيكي بقى ، فيه طرق كتير ممكن تساعدك انك تضحكي و تغيري مزاجك و تحسي بالهدوء النفسي و الراحة :-

** اذكري ربنا دايما و حافظي على الصلاه و الأذكار

** خليكي مرحة و إيجابية

** خليكي وسط الناس الإيجابية الطيبة

** استشيري طبيبك في أي حاجه مضايقاكي أو قلقاكي

** اتفرجي على عروض كوميدي مفيدة و خفيفة

** استرجعي الصور و الذكريات الإيجابيه عندك

** اضحكي مع أهلك و أصحابك

** مارسي الرياضة الخفيفة المعتدلة بشكل منتظم زي المشي الخفيف المعتدل ..

** اعتبري الضحك زي أي تمرين رياضي و خليه جزء من روتينك اليومي

و خليكي دايما فاكره انه كل صعب هيعدي ..

كل تعب هيمر ...

خليكي صبورة و شجاعة لحد النهاية ، عشان تعدي التجربة بفرحة و فخر ليكي و لعيلتك ..

و كله في ميزان حسناتك عند ربنا ..

#بيت_العافية_الكبير 🏡

د.ياسمينا شاهين

طبيب أمراض النساء و التوليد و العقم ..