بجد أحلى خبر النهاردة

"وجود رواية فوق رأسي سحابة في القائمة الطويلة لجائزة البوكر"

الواحد متلخبط مش عارف يبدأ منين ولا منين

ألف مليون مبرووك للكاتبة السكندرية القوية والمتميزة دعاء إبراهيم

في معرض الكتاب 2025كان من أول الروايات اللي رحت عليها كانت رواية فوق رأسي سحابة.

بطلة الرواية لأول مرة تكون ممرضة مصرية واللي عندها عقد اجتماعية وبتهرب من نفسها لليابان.

بس محدش يقدر يقدر يهرب من نفسه ومن ماضيه ومن السحابة اللي فوق راسه.

دي مش مجرد حكاية لكنها تجربة مليانة بالوجع… بتخليك تحس إن في ناس عايشين حوالينا بس فوق راسهم سحابة سودا وإحنا مش شايفين.

 مشاهدها تقيلة… شخصياتها صادمة… والصدق اللي فيها بيخبطك في عمقك لحد ما يوجعك.

وأنا ختمتها وأنا متأكد إنها من أقوى الأعمال النفسية اللي قريتها في حياتي."

رحلتي مع الكاتبة الدكتورة دعاء إبراهيم كانت من خلال 3 محطات أو 3 روايات… أولها كانت رواية ست أرواح تكفي للهو واللي كنت أسمع عنها بس إنها حاصلة على جايزة فلسطين الدولية دورة "غسان كنفاني" عام 2021 … ودي شهادة لوحدها إن العمل ده مش سهل.

المهم إني قرأت الرواية في نفس الشهر ومن أول صفحة نلاقي إن البطل بيعترف إنه قتل حد… بس مش عارف مين.

ومع أول كام صفحة هتلاقي نفسك محبوس جوا عقل مريض نفسي… كذاب، خايف، عنده هلع وفصام…

هتعيش فعلا كل أحداث الرواية بالكامل جوا دماغ مريض عقلي؟!

كانت تجربة مخيفة بس عظيمة… لدرجة إني خلصتها وأنا بيني وبين نفسي بقول: دي مش رواية، دي رحلة جوه الجنون."

وبعدها دخلت عالم روايتها التانية حبة بازلاء تنبت في كفي…

 وهنا الموضوع بقى أعمق وأصعب…

 الرواية دي بجد حسستني إني ركبت على زحليقة نفسية… 

بطل الرواية دكتور ومريض نفسي حابس نفسه جوه دولاب ويحاول يكتشف نفسه وذاته وسط ذكرياته اللي كانت مليانة أسرار

كقاري بتجمع قطع البازل، وكل واحد يقدر يكوّن صورة مختلفة.

 أنا شخصيًا حسيت إني قاعد قدام مراية… وكل صفحة بتكشفلي مرض أو علة جوايا أنا.

الرواية بتتكلم عن الطفولة وحكاياتها وتأثيرها وقوتها في بناء الشخصية.

دي رواية بتخليك تسأل نفسك: إنت مين؟ وإيه اللي جواك فعلاً؟"

لو بتحب الأدب النفسي… أو نفسك تجرب رحلة تخليك تعيد التفكير في نفسك والعالم… يبقى لازم تبدأ مع أعمال الكاتبة وأكيد في أي عمل معاها هتلاقي تجربة مختلفة في عالم الواقعية السوداء والدراما التي تستحق كل التقدير ..والاحتفاء بيه.

وأخيرا متنسوش تشوفوا الحلقة الأولى من برنامج كاتب و مكتوب على اليوتيوب وتشوفوا اللقاء الحصري مع الكاتبة.

#أحمدمجدي