الزمن : الساعة 9 بليل
المكان : قهوة صغيرة على نصية شارع جانبى شبرا
وصلت القهوة الى خالد بعتلى اللوكيشن بتاعها مش المكان الى كنت بقابله فيه زمان و لا حتى جو القهاوى الى بيحبها ابوكف الى بيحب الزحمة و الصوت العالى قهوة هادية نورها ضعيف و فيها اربع ترابيزات دخلت لقيته قاعد فى ركن ماسك كوباية الشاى و عينه على الارض اول ماشفنى وقف حضنى بس حضن ناشف مش بتاع واحد مرتاح قعدنا و بعد لحظة صمت قالى : انا اللى فتحت الباب سكت لحظة كدا مش عارف ابدا منين ولا حتى ارد عليه بايه بس عينيه كانت باينة .... متغير
فاكر لما كنا فى دهشور ؟ فاكر لما قلنا ننسى كل دا ؟
هزيت راسى قال و هو بيولع سيجارة بايده الى بتترعش : انا معرفتش انسى كنت كل يوم بحاول افتكره عشان اقنع نفسى انه حلم بس الحلم لما بيتكرر بنفس التفاصيل بيبقى واقع يا صاحبى قلتله : انت شوفت ايه ؟ قالى : الباب دا مش باب دا مجرد لوح خشب و المفتاح دا حاجة بتفتحلك مبين مكانين مكان احنا مش مفرروض نكون فيه
قلت بس هو اتفتحلك ازاى ؟ انت كان معاك المفتاح ؟ قالى المفتاح اختارك انت انا كنت خطوة اولى وانت الى عليك الدور و الباب لسا عايز يتفتح للاخر سالته بقلق طيب لما اتفتح ايه الى حصل ؟ سكت سحب نفس طويل من السيجارة وقال : الى جوا مش شكل ولا كيان الى جوا فكرة بتتحرك وسطنا و مستنيا الى يكملها حسيت بحاجة تقيلة جوا صدرى كان حاجة اتنقلتلى من غير ما يقول و قبل ميقوم و يمشى قلتله : انت بتقولى انك فتحت الباب بس محدش بيفتح حاجة من غير ما يعرف الى بيدور عليه ؟ كنت بتدور على ايه يا خالد ؟ ضحك ضحكة قصيرة من غير روح و قالى : كنت بدور على حاجة تفسرلى ليه بحس ان فى حاجة دايما ناقصة بس لما دخلت لقيت انا النقصان نفسه هو الجواب سكت لحظة كدا و بصلى قالى المفتاح الى معاك فاكر شكله مش النقش ملمسه اققصد ؟ معدنه تحسه مش معدن عادى صح ؟ تحسه بيتقل كل لما بيحصلك حاجة صح ؟ بيملى حاجة شيه الفلاشة كدا بس الفرق انه مش بيخزن بيخبى قلتله وانا خايف يمكن بيختار مين يستحق يعرف الى مخبيه ؟ رد عليا بهدوء مرعب : المفتاح مش بيختار المفتاح بينادى و انت سمعته قلتله يعنى لو فتحت هعرف يعنى هو مخبى سر ؟ هز دماغه و قال : المفتاح مش بيخبى سر واحد هو بيخبى الحقيقة كلها الحقيقة الى مش جاهزين لها عارف ليه ؟ عشان مش كل الاسئلة ليها اجابة تطمنك سالته و انا بحاول اقاوم خوفى طيب لو سكتنا لو سبناه قالى بعد سكوت طويل المفتاح زى الندبة موجود عشان تفضل فاكر و ساعة ماتحاول تنساه .. يوجع و بعدين سالنى و هو بيشرب اخر شوية شاى حاسس انك عايز تفتحه ؟ قلتله حاسس انى لازم افتحه مش بايدى ابتسم ابتسامة صغيرة كانه بيوافق و قالى و هو قايم : لما تفتحه متقفلوش اللى جواه محتاج يخرج و سابنى ومشى