فيه تقرير بيتعمل كل سنة اسمه "تقرير السعادة العالمي" وده مهمته اختيار أكتر شعوب العالم سعادة ورخاء وحاجات كده ربنا يعافينا منها.
المهم تم اختيار دولة "فنلندا" كأسعد دولة في العالم وشعبها بيعيش حياة مُترفة وهانئة وسعيدة!
طبعاً سيادتك بتسأل ليه واشمعنا فنلندا وتفرق إيه يعني عن مصر أو دولة عربية مثلاً أو حتى ليه مختاروش أمريكا ولا فرنسا؟.. ليه فنلندا وإيه المعايير اللي ع أساسها بيحددوا أسعد شعب؟
خليني الأول أعرضلك بعض المميزات اللي بيتمتع بيها الشعب الفنلندي وحاول تمسك نفسك شوية:
1- أول ما الطفل السعيد يتولد ع طول بتقوم الدولة بإرسال صندوق كيوت كده فيه كل المستلزمات الضرورية للطفل، إشيء حفاظات وإشي لعب وإشي بنطلونات وقمصان.
2- لا ومش بس كده، ده كمان بيتصرف له شهرياً حوالي 100 دولار والمبلغ ده يا مؤمن بيفضل مستمر لحد ما الطفل السعيد ده يكمل 17 سنة، بعد كده بقى لازم تعتمد ع نفسك أيها الفتى المُدلل. الدولة كده عملت معاك الواجب وزيادة.
3- التعليم عندهم حاجة خرافية، تقريباً أفضل مستوى تعليم في العالم، معندهمش مدارس خاصة. كلها حكومية وكلها ليها نفس القدر من الأهمية يعني مفيش مدرسة أفضل من التانية، كلهم أصلاً أحلى من بعض.
4- خد دي بقى وامسك دموعك، الدولة قررت إتاحة الإنترنت كحق مجاني من حقوق الشعب الفنلندي، وإنترنت فائق السرعة. ببلاش، معندهمش حاجة اسمها we.
إنت بتعيط؟.. وحد الله بقى ياعم، وتعالى أجاوب لك ع سؤالك: إيه المعايير اللي بيحددوا ع أساسها أسعد شعب؟
الموضوع ملوش علاقة بأي اعتبارات سياسية مثلاً أو مدى شهرة الدولة، الموضوع بيعتمد ع كل جوانب الحياة في الدولة دي، يعني مثلاً:
مستوى التعليم في الدولة.
متوسط دخل الفرد.
مدى كرم الدولة مع المواطنين ومستوى الدعم الاجتماعي.
نسبة الفساد في المجتمع.
حرية الرأي وحرية اتخاذ القرار.
متوسط أعمار السكان.
معدلات الجريمة.
وحاجات تانية كتير، هما كلهم أصلاً ع بعض حوالي 6 مليون نفر في فنلندا. عايشين أسعد أيام حياتهم، لا تقولي بقى صراعات سياسية ولا طائفية ولا سرقة ولا حوادث. ما شاء الله قفّلوا اللعبة خلاص!
أسيبك بقى تستمتع بالصور مع تمتمة بعض الأدعية من أجل الذهاب لهذه الجنّة الأرضية. (وادعيلي معاك لو سمحت)
التعليقات