مع أولى حلقات برنامج هدى للناس، الـ كان مضمونها عن سورة الفاتحة، الحقيقة إن الحلقة برغم صغر مدتها، إلا إنها كانت دسمة لأبعد حد. هخطفكم في رحلة سريعة حول المعاني الجميلة الـ دكتور أحمد عبدالمنعم ربنا يرضى عنه، سلط الضوء عليها. طبعًا كلنا مدركين لأهمية سورة الفاتحة، وإن العلماء أطلقوا عليها أسماء كتير جدًا، دكتور أحمد قسم آيات السورة لـ ثلاث أجزاء مهمين جدًا وهما كالآتي:-
①أول تلات آيات: دول ثناء العبد على ربنا سبحانه وتعالى، والحقيقة إن الإنسان لما بيحب حد بيثني عليه كتير، وبيركز دائمًا على مدح صفاته، وفي أول تلات آيات من سورة الفاتحة ربنا عز وجل علمنا طريقة الثناء عليه، من خلال حمده وتعظيمه جل وعلا.
②الآية الوسطى في سورة الفاتحة: ودي دكتور أحمد قال عنها: إنها إقامة العبد في وجهته ومعرفة دوره بالظبط إيه، سبحان الله آية واحدة قادرة تحدد دورلنا بكل وضوح، وهو العبادة والاستعانة بالله عز وجل " إياك نعبد وإياك نستعين"
③أخر تلات آيات من سورة الفاتحة: دول عبارة عن دعاء، فسبحان من وجه بصرنا ناحية أهمية الدعاء وطلب العون من ربنا عز وجل، وكانت أول دعوة في الآيات الثلاثة عبارة عن طلب الهداية من ربنا إتجاه الطريق الصحيح، وهو طريق الحق، لو ركزنا لوهلة هنعرف إن بدون وجهة صحيحة كل أعمالنا بلا معنى.
في حديث جميل مضمونه إن ربنا قسم سورة الفاتحة بينه وبين العبد، علشان كدا لازم نستشعر إننا وإحنا بنقرأ سورة الفاتحة إن ربنا بيرد علينا مع كل آية بنقولها، وإن حياة المسلم بتدور أساسًا حول الثناء على الله والدعاء. ومن ضمن الحاجات الجميلة في تفسير سورة الفاتحة إننا بنحمد ربنا على نعمة وجود ربنا، أنتم متخلين؟ زي بالظبط لما يكون في حياتنا حد جميل وكل شوية نقوله شكرًا على نعمة وجودك، كمان التأمل في خلق الله من ضمن الحاجات الـ بتخلينا نستشعر عظمة ربنا سبحانه وتعالى، نبص لكل حاجة حوالينا وإحنا بنستحضر عظمة الخالق عز وجل.
وفي النهاية حابة أقولكم إن الحلقة حقيقي جميلة جدًا، لازم تسمعوها بقلوبكم، ربنا ينور بصيرتنا ويرزقنا العلم والحكمة والثبات على الحق في عفو وعافية.♥️
#فاطمة_شجيع
وقفـــة تأمليــــة.
