انهارده وقبل ما ابدا تاني سنه ليا فالكلية، افتكرت منه ربنا عليا بحاجات كتير السنه الي فاتت… افتكرت منه ربنا عليا بأن هو حفظني من فتنه النساء، زي ما انا دعيت قبل كدا بدايه السنه وكنت خايف وبعيط بشده من خوفي من الموضوع، افتكرت ان انا خلال السنه كنت بستهبل، كنت ببص، كنت بشارك فالجروبات الصغيره الي فالكلية الي بيكون فيها بنات وبيكون فيها ضحك حتى بعد ما اعرف ان فيها هزار وضحك، برده بكمل، مع ذلك ربنا حفظ قلبي وستر عليا والسنه خلصت من غير ما احب او اتعلق ببنت، خصلت وانا الي لما كنت ف 3 اعدادي من مجرد شوية كلام اون لاين وقعت وقعه صعبه، وانت حالك دلوقتي مش احسن من حالك قبل كدا كتير، بس مع ذلك ربنا رحمك، فربنا يرحمك ويسترك فالسنه الجايه زي ما سترك فالسنه الاولى.
افتكرت منه ربنا عليا بوجود محفظه، بتحفظني، وبتهتم بمواعيدي وتأكد عليا من فتره للتانية انه متسبش القرءان، حافظ على القرءان لا يتفلت منك، وكانت بترن عليا وحريصه على موعدي ممكن اكتر مني، وانا كنت مع ذلك مش مقدر وجودها، كنت بتجاهل الرد عليها اوقات كتير، كنت مش بسمع كويس، كنت مش براجع اصلا كويس، ولا كنت حريص دايما على الاعتذار ليها، ربنا يكتب ليها الخير فكل مكان وكل وقت ويباركلها فعمرها واولادها وتحفيظها ويوفقها فكل الي هي عايزاه فحياتها ويجازيها عني كل خير.
افتكرت منه ربنا عليا، بأن انا السنه الي فاتت كنت بستهبل فالمذاكره ونص مذاكره كدا دايما وانا عارف ان مستوايا يجيب بالعافية مستوى الطالب المتوسط، بذاكر محاضره ومحاضره، احيانا براكم لأخر الترم، بس بحضر يدوب المحاضرات، بس مع ذلك كنت فعين زمايلي طالب دحيح، طالب لو حد اتزنق ممكن تسأله، طالب من الاوائل والمتفوقين ولو وقعت بوضوح، يبقا مظلوم او ايه الي وقعك جامد كدا؟ يا شباب، انا مطلعتش عشان اقع، بس ربنا ساتر عليا.
الحمدلله الي كمل ليا النعم، واستغفر ربنا من كل غضب او سخط حسيت بيه بدل احساسي بنعم ربنا الكتير حولي من غير ما انتبه ليها
لا يوجد تعليقات بعد، كن أول من يبدأ النقاش