3 قلوب

وانا ع الشط فى قلبى الخوف

شـوفت الشـط التانى بعـيد

مش أبعد من خط الشوف

قولت أروح هناك فى امان

والف شوية هناك وأطوف

ولسة بقدم خطوة يا دوب

قلبى انقسم تلات قلوب

قلب يخوف

وقلب يطمن

وقلب بيسأل

وعرفتى العوم ؟

ضحكت وقولت

دة انا اعوم وأعوم

ولسة بقدم خطوة كمان

إنكسر قلب الأمان

ومبقاش فيه غير قلب يخوف

وقلب بيسأل

فاكرة انهاردة زي زمان ؟

مش كل من عرف العوم بيعوم

ضحكت كسرت قلب الخوف

وقدمت خطوة فخطوة فعوم

ومبقاش فيه غير قلب بيسأل

بصي يمينك بصي شمالك

بصي وراكي وشوفي قدامك

أيها شط من الشطين

قادرة تشوفي بشوف العين

بصيت حوالية

انا مش شايفة

أنا وسط المية

ووسط المية

.

.

.

مفيش غير مية

ـــــــــــــــــــــ