يوم الثلاثاء الماضي سعدت بالتواجد مع صديقتي الشاعرة القاصة @essamweaam في مدرسة منفلوط الثانوية بنات برعاية نادي أدب منفلوط
الحقيقة اليوم ده كان مميز جداً بالنسبة لي وكنت متحمسة له جداً
زمان وأنا صغيرة كان نفسي أبقى مدرسة لغة عربية وأعلم الطلاب اللغة والأدب وأأثر فيهم وكدهون يعني، وكان حلم حياتي إني أدخل كلية تربية لغة عربية
بس بعد كدة لما كبرت شوية حسيت إن الصحافة ممكن يبقى تأثيرها أوسع وتوصل لناس أكتر في مراحل عمرية مختلفة عشان كدة قررت أدرس إعلام بدل تربية لغة عربية
وطبعاً لما اتخرجت اتفاجئت بسوق العمل الميت في الصحافة وخصوصاً محلياً في أسيوط يعني، واتجهت برضه ساعتها للتدريس واشتغلت فترة صغيرة كإخصائية إعلام في مدرسة الأقصى الابتدائية، وتوقفت بعد كدة عن العمل لظروف مرض جدتي وملازمتنا ليها في آخر سنوات عمرها الله يرحمها
ولكن يظل حلم التفاعل مع الطلاب سواء كانوا أطفال أو مراهقين من الحاجات اللي بتهزني أوي ولا زلت بتمناها
فكرة ان طفل أو طالب يجي يقولك انه اتعلم منك حاجة جديدة أو إنك أثرت فيه أو بمنتهى البراءة إنه بيحبك دي حاجة عظيمة جداً
لسة فاكرة مرة زمان لما نزلت مع جمعية خيرية تطوع إننا ندي أطفال في منطقة شعبية دروس تقوية مجانية، وواحدة من البنات جت في مرة حضنتني وقالت لي إنها بتحبني، كان إحساس يفوق الوصف
أما بالنسبة لليوم ده فأنا كنت مبسوطة فعلاً وأنا وسط البنات وكنت حاسة إني عايزة اتكلم معاهم كتير وأقولهم كل حاجة أعرفها واتعلم منهم برضه كل حاجة يعرفوها وأقرأ معاهم اللي بيكتبوه بس للأسف الوقت مكفاش كل حاجة كان نفسي فيها وخلصنا بسرعة :[
واليوم ده فكرني لما كنت قدهم ود/ الأمير صحصاح الله يرحمه جالنا المدرسة وادالنا محاضرة عن الصحافة وقسم الإعلام في كلية آداب، وأول ما دخلت الكلية بعد كدة جريت ع عنده في المكتب عشان أنزل اتدرب معاه، وكان مستغرب إن طالبة في سنة أولى لسة متحمسة للتدريب كدة وإن عادة محدش بيطلب يتدرب غير في سنة تانية، الله يرحمه ويحسن إليه حسيت لوهلة إني بنقل دوره اللي هو عمله من سنين كتير معايا زمان
كان نفسي نتصور سيلفي في الآخر كدة مع البنات كلهم بس أول الندوة ما خلصت بنات جم يسألوني وشوية يسألوا وئام ومنهم اللي مشي بسرعة فمعرفناش ننظم الموضوع، أخدنا صور فردية كدة من ع موبايلات البنات بس مش عارفة هتوصلني بقى في يوم من الأيام ولا لا 😂
كان يوم جميل ❤️😍
#صفحات_من_حياتي
#سارة_الليثي
التعليقات