جارتي وزوجها

أنا بكتب الكلام ده مش عن نفسي، بكتبه عن أقرب صديقة لقلبي وهي جارتي وهي دلوقتي في حالة مش بتمناها لعدوي.

صاحبتي عندها 33 سنة، متجوزة من 8 سنين، وعندها ولد واحد وطول معرفتي بيها وهي ست بيت شاطرة، هادية، ونظيفة في نفسها وجميلة وعمر العيبة ما تطلع منها.

طلعت من يومين على صوتها وصريخ وعياط ولما دخلت عليها شفت المصيبة بنفسي جوزها في سريرها مع أختها الصغيرة اللي متجوزة.

جوزي أول ما فهم الوضع لم الموضوع وقال قصاد الجيران ان في مشاكل وعرفنا إن العلاقة دي مستمرة من سنين، طبعا اختها مشيت من البيت وصاحبتي منهارة ومش في حالة طبيعية وهي دلوقتي في حالة صدمة وانا مش قادرة أفكر أصلا ولا أنصحها طب وأقول أيه؟؟

تطلب طلاق ولا تكمّل، خايفة على ابنها، وعلى سمعة أختها وبصراحة أنا مش بكتب علشان أفضح حد، ولا علشان آخد موقف مكانها. أنا بكتب لأن صاحبتي محتاجة حد يقولها تعمل أيه، أنا عن نفسي مصدومة ومش عارفة افكر ومش قادرة حتى اتصور الكلام اللي ممكن يتقال هي عندي في بيتي في حالة صدمة ومش بتتكلم ومش عارفة أعملها إيه غير إني أكون جنبها.

اللي عنده كلمة طيبة، أو تجربة مشابهة، أو حتى دعوة بظهر الغيب، يقولها.