رحلة الفريلانسر بدأت معايا لما قررت إني ارجع أكتب بس مش هاكتب عن افكاري لأ !!
هاستغل الموضوع واكتب في الطب عشان بقالي سنة كاملة وقفت شغل صيدلة، وكمان سبت الشغل الحكومي عشان حاجات كتيرة.
وكمان بسبب جائحة كورونا فعلا كانت بداية إن الناس تعترف إن ممكن شغل من البيت عادي.
بدأت رحلة كورس كتابة المحتوى و البحث عن العمل
ومن حسن الحظ إن الكورسات متوفرة أونلاين ومع رحلة البحث عن العمل بعد الكورس أصيبت بإحباط شديد !!
(متسمعش كلام أي إعلان يقولك هتقبض بالدولار، لأنك محتاج تشتغل على نفسك جدا وتدعي ربنا كتير جدا أنه يوفقك، موضوع مش مجرد كورس و هتقبض بالدولار و خلاص!!)
الأولوية دائما لأصحاب سابقة الأعمال، طب واللي ملوش سابقة أعمال، يعمل ايه ؟!
التطوع يا أختاه
طبعا بعد يأس حد نصحني أقدم على بيدجات ومواقع تطوع وهنا كانت بداية الأمل
بدأت ادخل تطوع في كل حاجة وأي حاجة كتابة محتوى أو مقالات أو عمل فديوهات أو فويس أوفر.
لحد ما جالي أول شغل 🙏🏻 الفضل لله
ومن الشغل ده اتعلمت ٣ حاجات مهمة
- العالم مش منصف وإن لازم تقدم تنازلات كتيرة عشان بس تشتغل.
- مش طول الوقت لازم نهندل العميل في وقت ممكن نقول للعميل شكرا لحضرتك فرصة سعيدة وتقدر تشوف حد تاني يتولى المهام. ( أنت كده مش بتقطع رزقك الرزاق هو الله )
- خلي دائما عندك كذا بديل ( السوق مش مضمون )
ومن هنا بدأت اتقلب بين الشغلانات و اتعرفت على كمية ناس و شخصيات كتيرة بدأت اتعلم شوية بشوية مهارة إني اقرأ اللي قدامي واعرف اهدنله صح و اتعامل معاه على حسب شخصيته.
التعليقات