عندنا مبدأ كده في القانون المصري الحلو الجميل أبو عيون جريئة بتاعنا اسمه (مبدأ استقلال القاضي) واللي معناه إن القاضي مستقل عن:-
1- الحكومة.
2- الناس.
مبدأ استقلال القاضي عن الحكومة هو مبدأ اتحط عشان يضمن القاضي مش هيتأثر بالحكومة المصرية، ولا رئيس جمهورية يكلمه يقوله احكم بالحكم الفلاني ولا أي حاجة من دي.
وعشان القاضي يضمن إن مفيش حد في الحكومة يأثر عليه اتحطله ست قواعد تأمنه وتحميه من تدخل الحكومة، ركز فيهم كده عشان فيه مصيبة جاية في الطريق، القواعد الستة دي هي:-
1- الاستقلال الوظيفي للقاضي، فمفيش حد من حقه يتدخل في القضايا المعروضة عليه، ولا حتى محكمة تانية، إلا بإذن منه.
2- الاستقلال الإداري فمفيش حد مدير عليه، هو كموظف مدير ذاته.
3- مجلس القضاء الأعلى، مجلس القضاء الأعلى هو عبارة عن مجلس لشوية قضاة تانيين كده هما المسؤولين عن حماية القضاة من تدخل الحكومة، فمفيش قرار يصدر من الحكومة بخصوص القضاة ينفع يتطبق إلا بموافقة مجلس القضاء الأعلى.
القاضي معليهوش كبير.
4- نظام التفتيش القضائي وهو عبارة عن هيئة من مجموعة قضاة مهمتهم التفتيش كل سنتين على الأقل ورا كل قاضي عشان لو فيه فساد ولا حاجة.
5- عدم القابلية للعزل، يعني القاضي وأعضاء النيابة العامة مينفعش حد يعزلهم من الحكومة إلا مجلس التأديب الخاص بالقضاة فقط، واحفظلي النقطة دي هنرجعلها كمان شوية.
6- مرتبات وترقيات القضاة بإيد مجلس القضاء الأعلى مش بإيد الحكومة.
لحد هنا ويبدو الموضوع حلو وجميل وجامد جداً وقضاءنا مستقل وشامخ ومفيش حد يقدر عليه، تعيين القضاة وترقيتهم ومرتباتهم والتفتيش وراهم وعزلهم مش بإيد الحكومة وإنما بإيد مجلس القضاء الأعلى ومجلس التأديب وهيئة التفتيش القضائي، دول بس اللي ليهم شغل ع القضاة مش الحكومة.
بص بقى المصيبة الجاية دي.
مجلس القضاء الأعلى ومجلس التأديب وهيئة التفتيش القضائي اللي بيعينهم ويشغلهم ويدير عليهم هي اسم الله حارسك وصاينك الحكومة 🙂🙂🙂
الحكومة بتقولكم: انتوا عايزين إيه؟ عايزين استقلال قضائي؟ طيب خدوا استقلال قضائي، احنا الحكومة مش هنتدخل في شغل القضاء أبداً، ومجلس القضاء الأعلى ومجلس التأديب وهيئة التفتيش القضائي هما اللي هيتدخلوا مش احنا، خلاص كده؟ بس معلش احنا اللي هنعين أعضاء المجالس دي كلها، وابقوا شوفلكم كلبة تحموها.
طيب إيه الدليل على إن كلامي صح؟
الدليل من كلامي هو القانون نفسه.
بص كده قانون السلطة القضائية بيقول إيه:-
مادة ٤٤
(يكون شغل الوظائف القضائية سواء بالتعيين أو بالترقية بقرار من رئيس الجمهورية).
يعن الوظائف القضائية بما فيهم مجلس القضاء الأعلى ومجلس التأديب وهيئة التفتيش القضائي وكل دول بيتعينوا بقرار من رئيس الجمهورية 🙂
يعني لو حد فيهم خالف أوامر الحكومة هيتمد على رجليه 🙂
هنا ممكن واحد يطلع يقولي إن قرار رئيس الجمهورية مش مطلق، وإنه لابد من موافقة مجلس القضاء الأعلى على أي قرار لرئيس الجمهورية بخصوص القضاة.
وهنا هقولك كلام صح، بس غلط 🙂
افهم بس، مجلس القضاء الأعلى ده بيتكون من إيه؟ المادة 77 من قانون السلطة القضائية مكرر 1 بتقول:-
( يشكل مجلس القضاء الأعلى برئاسة:-
رئيس محكمة النقض.
وبعضوية كل من:
رئيس محكمة استئناف القاهرة.
النائب العام.
أقدم اثنين من نواب رئيس محكمة النقض.
أقدم اثنين من رؤساء محاكم الاستئناف الأخرى).
مين رئيس مجلس القضاء الأعلى؟
- رئيس محكمة النقض.
طيب بص كده رئيس محكمة النقض بيتعين ازاي:-
مادة ٤٤ من قانون السلطة القضائية:-
(ويعين رئيس محكمة النقض بقرار من رئيس الجمهورية).
انت ازيك عامل ايه؟ 🙂
ومش بس رئيس محكمة النقض اللي بيتعين بقرار من رئيس الجمهورية، مجلس القضاء الأعلى بيتكون رئيس محكمة النقض وده بيتعين بقرار من رئيس الجمهورية، وبيتكون كمان من النائب العام، عارف النائب العام ده بيتعين ازاي؟ بص كده:-
مادة ١١٩ من قانون السلطة القضائية
( يعين النائب العام بقرار من رئيس الجمهورية ).
قلتلي انت عامل ايه؟ كويس يعني؟ أنا بس قلت أطمن عليك 🙂.
احنا لنا الله والله 🙂
التعليقات