لاحظت مؤخرا إن الالتزامات المادية بقت أكبر وأثقل من زمان، خصوصا مع زيادة الأسعار وتغير أسلوب الحياة. زمان، كان الشاب يقدر يغطي مصاريف البيت والزيارات والمناسبات بمبلغ بسيط نسبيا، والهدايا كانت رمزية أكثر، وحتى السفر أو المناسبات الخاصة كانت أقل تكلفة، والحياة المادية كانت أخف وأبسط.
دلوقتي نفس الالتزامات بقت مضاعفة: مصاريف البيت أعلى، الهدايا لازم تكون غالية وإلا يتهان، بوكسات رمضان وعيد الحب والعيد وهلم جرا، والمناسبات الاجتماعية متكررة وكل مرة فيها تكاليف إضافية، ده غير مصاريف الدراسة، النقل، وحتى الحفاظ على علاقاتك الاجتماعية دلوقتي بقا مرتبط بالخروجات. كل ده بيخلي الناس تحس بضغط مش بس لإدارة حياتهم بل للحفاظ على صورتهم الاجتماعية أمام الناس.
بالنسبة لي، مهم يكون عندنا وعي بالحدود المالية ونفرق بين اللي ضروري واللي زائد، ونحاول نخطط لمصاريفنا بشكل يحافظ على الأموال وعلى صحتنا ونبعد عن الضغوط دي، لأن الالتزامات المادية لو زادت عن الحد تتحول لمصدر ضغط مش راحة، وده اللي بيحس بيه أغلب الناس دلوقتي مقارنة بأيام زمان.
التعليقات