#حكاية_بحث

الحكايه مش حكاية البحث

حكاية الكفاح اللى ورا البحث.. حكايتي أنا 😋

حكاية بنت للزحف المقدس قامت و ثارت

بنت خطوتها تولع شرار

بنت كافحت و انكتب لها الانتصار.. تسمعوا الحكاية؟😁

احم هعتبر إنكم قلتوا بس قوليها من البداية وهحكي 😛

كان يا ما كان في سالف العصر والأوان (اللي هو من سنتين تلاتة يعني)

كان من المقرر عقد المؤتمر الإقليمي لإقليم وسط الصعيد الثقافي اللي بيشمل محافظات (المنيا- سوهاج- أسيوط- الوادي الجديد) في محافظة أسيوط في 2023

ونزلت المسابقة البحثية ساعتها وكان موضوع المؤتمر أصلاً عن الصالونات الثقافية والصناعات الثقافية وكدة

قلت بس كدة الدنيا زي الفل المؤتمر في أسيوط ومش هيبقى فيه أي مشاكل أو عوق في حضوره يعني ولا حد عندي هيعترض في البيت والموضوع هيمشي زي السكينة في الحلاوة كدة وزي الفل

وبالفعل بدأت أشتغل ع البحث واخترت صالون آفاق الثقافي بأسيوط كعينة وطلعت عيني وأنا بطلع الكلام من بقهم عشان أكتبه في البحث 😁

علي عبد الرازق اللي بيقولي مرحلة التأسيس دي قديمة أوي وأنا مش فاكر عنها حاجة، و محمد عبد الظاهر اللي بعت لي كلمتين مع علي ميعملوش فقرة حتى مش بحث، مفيش غير د. سارة أحمد الله يمسيها بالخير هي اللي بلت ريقي وبعتت لي كل التفاصيل

وبعد ما خلاص خلصته قام صدر قرار التقشف وقرروا إلغاء المؤتمرات السنة دي 🙄

قلت أنا نحس ايه النحس ده؟ يعني يوم ما أقول خلاص الدنيا اتسهلت والمؤتمر جالي لحد عندي يقوم ملغي 😥 (معرفش ربنا بيحضر لي ايه)

والسنة اللي بعدها لما المؤتمر اتعمل في أسيوط برضه لكن غيروا موضوعه ومحاوره؛ فمكنش ينفع أقدم فيه بالبحث ده، وأصلاً كنت مشغولة ساعتها وفي القاهرة ومحضرتش المؤتمر أصلاً؛ فعملتش بحث جديد ع محاوره الجديدة

وبالصدفة السنة دي لما شفت إعلان المسابقة البحثية لـ #المؤتمر_العام_لأدباء_مصر وعلى الرغم إن موضوع المؤتمر أصلاً عن الأدب والدراما إلا إنه كان فيه محور أخير كدة ع استحياء عن الصناعات الثقافية

قلت بس هو ده اللي يليق معاه البحث بتاعي، وقمت باعتاه

كان من المقرر في البداية إن المؤتمر يكون في بورسعيد قلت مش مشكلة هينة إن شاء الله وأقدر أقنعهم في البيت إني أروح بورسعيد يعني دي كلها ساعتين من القاهرة وهم ممكن يبقوا في القاهرة الفترة دي فميحسوش بالقلق عليا يعني

وبعدين لما اتغيرت الخطة عن إقامة المؤتمر في بورسعيد بقى فيه كلام عن احتمالية إقامته في القاهرة

قلت حلو أووووي كدة هتبقى زي الفل ومحدش هيعترض عندي ف البيت والموضوع هيبقى زي المؤتمر الإقليمي لو كان اتعمل في أسيوط ساعتها

بس قوم هوب بعد كدة قالوا إنه هيتعمل في العريش

ساعتها أصبت بالإحباط كدة وخصوصاً كانت النتيجة لسة مظهرتش قلت يبقى خلاص أنا متقبلتش أصلاً وكدة كدة كان هيبقى صعب أقنعهم في البيت أروح العريش فخلاص قدر الله وما شاء فعل يعني

قوم هوب فجأة شريف شجاع وأ. #نعيم_الأسيوطي Naeem Alasuty يبعتولي يباركوا لي (كانوا بيبعتوا يقولوا مبروك ويختفوا اللي هو طب مبروك ع ايه يعني؟ يا حاج اسماعيل مبروك ع ايه؟)

ما أنا بيبقى فيه كذه حاجة تانية مقدمة فيها في نفس الوقت ومش عارفة الكلام ع ايه يعني

وأنا مكنتش أعرف مين في أمانة المؤتمر أصلاً غير أ. نعيم يعني بحكم انه أمانة أسيوط، ومع ذلك مكنتش قايلاله ولا قايلة لأي حد في الدنيا إني مقدمة بحث في المسابقة البحثية للمؤتمر

حتى أ. سفيان صلاح هلال اللي حكم أبحاث المؤتمر حاول يلمح لي في الكومنتات عن البحث انه اتقبل يعني واتكلم في تعليق عندي إني بحضر صالونات ثقافية وكدة بس أنا بسم الله ما شاء الله على غبائي يعني ولا خدت بالي ولا ربطت المواضيع ببعضها أصلاً وافتكرته بيتكلم عادي يعني اني بتنطط في فعاليات كتير في القاهرة وكدة، وأنا مكنتش أعرف برضه أصلاً إنه بيحكم الأبحاث فمجاش في دماغي يعني

بس عرفت في الآخر إن البحث اتقبل في المؤتمر الحمد لله لما اتقالت لي صريحة يعني، يعني حتى لما أ. نعيم قالي هتروحي العريش ده بالنسبة لي مكنش رد كافي اللي هو هروح العريش ليه طيب؟ البحث اتقبل؟ سؤال غريب الأطوار الحقيقة أمال هروح العريش أعمل ايه يعني هيعدوني من ع الحدود للناحية التانية مثلاً 😏

ومن بعدها بدأت في خوض معركة أخرى في إقناع أهلي إني أروح العريش وحدي، خصوصاً إن مش هيكون معايا أصدقائي المقربين وئام عصام و #آيات_الشريف Äýat Ëlshërêf اللي اتحاميت فيهم قبل كدة لما روحت تكريم مكتبة الإسكندرية

وفي هذه المعركة استغليت فكرة تنازلي عن منحة ورشة الكتابة في غانا السنة اللي فاتت قصاد وعد من أمي Randa Badr وقتها إن لو أي حاجة في مصر مش هتمنعني عنها وهتشجعني عليها

حاولت تتنصل من الوعد ده بإنها نفذته فعلاً لما سابتني أروح إسكندرية مع وئام وآيات، بس أنا دافعت عن موقفي ببسالة بإن منحة غانا كان المفروض أروحها لوحدي أصلاً لمدة 12 يوم مش سفرية صد رد لإسكندرية، وإن وئام وآيات لو تم اختيارهم يحضروا في المؤتمرات الجاية مش هيقولوا لا والله مش هنطلع غير لو سارة معانا يعني، ده غير إنهم مش محرم ليا يعني بما إن سبب رفضهم الأساسي فكرة اقتناعهم بإن سفر المرأة بدون محرم حرام، في حين شايفة إن الرد المنطقي ع ده هو برضه الحديث اللي الرسول بيقول فيه إن الظعينة (المسافرة) هتخرج وحدها لا تخشى إلا الله والذئب على غنمها؛ فلو فعلها حرام مكنش الرسول هيقره ولا هيصفها بإنها تخشى الله أصلاً وهي ترتكب أمر حرام!

وبعد كفاح طويل وصلنا لمعادلة مرضية للطرفين ألا وهو إنهم مش راضيين عن الموضوع ولو سافرت فأنا هشيل ذنبي لوحدي

وعلى الرغم من ده كله إلا إن أنا المرة دي كنت حاسة إن الموضوع متيسر جداً

يعني ساعة سفرية غانا أنا كنت بصلي استخارة وحاسة إني مش مرتاحة، وروحت كذة مرة عشان أطلع البسبور وفي كل مرة كانت تحصل مشكلة ما ويطلبوا ورق مش معايا وأروح من غير ما أخلصه، لحد في النهاية ما قررت أقطع الشك باليقين وأرمي الكورة في ملعب أمي، وأتحجج لنفسي بإني اخترت اللي هي تقول عليه براً بيها، وإن ده ممكن يكسبني بونط عندها عشان بعد كدة لما أعوز حاجة تانية أقدر أعملها

وقد كان بالفعل، والمرة دي كنت بصلي الاستخارة وأنا حاسة بارتياح شديد وان الموضوع هيتم للآخر وفعلاً تم الحمد لله

والصراحة برضه هو ده منطقي، ما هو الواحد مش أول ما يشطح ينطح يعني، مش أول ما أسافر وحدي أقوم مسافرة لدولة أجنبية مبتتكلمش عربي ومعرفش حد فيها ولو تهت فيها ع الأقل حتى مش هعرف أوصل لمكاني تاني بسهولة

الواحد يمشي خطوة خطوة كدة يطلع محافظة جوة بلده بعدين يروح دولة عربية بعدين يروح دولة بتتكلم إنجليزي يفهمه وبعدين ياخد ع الأجواء فينطلق بقى في العالم كله إن شاء الله 😁

انتظروني المرة القادمة في الأدغال بقى 😂

#إنجازاتي

#صفحات_من_حياتي

#سارة_الليثي