هل الإدمان مقتصر فقط على المخدرات والكحول؟
أنواع الإدمان كتير جدًا، ومش كلها واضحة.
فيه الإدمان الكيميائي زي: المخدرات، الكحول، والأدوية، وده النوع المعروف.
لكن فيه نوع تاني، من وجهة نظري أخطر بكتير، وهو الإدمان السلوكي.
الخطورة في الإدمان السلوكي إنه خفي… وصاحبه في الغالب مش بيكون واعي إنه مدمن أصلًا.
زي إدمان الإنترنت، اللي بقى منتشر جدًا في العالم الحديث،
وزي إدمان العلاقات العاطفية، اللي بيخلي صاحبه متعلّق بشخص معين بشكل مرضي، لدرجة إنه ينكر تمامًا إنه في "ورطة نفسية".
ومن أكتر أنواع الإدمان اللي شايفاها غريبة ومخيفة هو: إدمان الإباحية.
بجد، ليه حد يفضّل يتلصص على شخصين بيمارسوا علاقة جنسية غير واقعية؟
نعم… غير واقعية تمامًا.
هل مدمن الإباحية بيهرب من الواقع؟ ولا هو مش قادر يواجه العلاقة الحقيقية؟
هل الملل والفراغ والخيال الكاذب هما السبب في ده؟
غير كده، عندنا كمان:
إدمان التسوّق
إدمان الأكل
إدمان الكافيين
إدمان المقامرة
وغيرهم كتير… وكلهم ليهم نفس الشكل: اعتماد نفسي خفي.
والسؤال هنا: ليه كتير مننا ما بياخدش باله إنه مدمن؟
ولو خد باله… ليه بيخاف يواجه نفسه؟
هل هو فعلًا خايف؟
ولا بيكسف من نفسه؟
ولا مش عايز يصدق إنه ممكن يكون محتاج مساعدة؟
✍️بقلم: حياه إسماعيل
التعليقات