الصحافة الثقافية

هو أنا مكنش ينفع ألاقي الكتاب ده من أول ما سجلت الماجستير يعني؟

تؤ تؤ لازم ألاقيه في الآخر وأنا مزنوقة أصلاً عشان أرجع أعيد من الأول وأفتح النظري تاني وأقرأ له وأضيف له

وأصلاً في الآخر حاجات بسيطة جداً اللي أخدتها منه

ميزة الكتاب ده وعيبه في تفس الوقت إن كتابه مش صحفيين أصلاً وإنما أدباء وفنانين

وده خلاهم يهتموا بالمجال اللي بيتكلموا عنه أكتر من اهتمامهم بالكتابة الصحفية نفسها

يعني مثلاً فصل عن التغطية الصحفية للشعر أو الرواية

الكلام كله عن تاريخ الشعر والشعراء ولغة الشعر أو تكنيكات الكتابة الروائية ومناهجها وما إلى ذلك

كلام عن الصحافة بقى نفسها هم بكتيرهم كلمتين في الآخر، وكلام مش علمي أكتر من كونه تصور من الشاعر أو الروائي للتغطية الصحفية المثالية من وجهة نظره

وكذلك بقى في المجالات الأخرى: المسرح والفن التشكيلي والكاريكاتير وصحافة المكان وأدب الأطفال والسينما والفيلم الوثائقي والموسيقى والرقص والإدارة الثقافية

فعلى الرغم من إن الكتاب المفروض أصلاً كتاب دراسي لطلاب الإعلام في منهج الصحافة الثقافية على وجه الخصوص إلا إن محتوى الكتاب مفيد أكتر للي هيشتغل في المجالات دي نفسها مش هيكتب محتوى صحفي عنها، وإن كان الصحفي لازم يكون عنده خلفية عامة عن أي فن أو مجال بيكتب عنه، بس لازم يدرس أكتر أساليب كتابته هو نفسها أكتر من كتابة وتنفيذ المجال التاني نفسه

كمان المحتوى ممكن يكون مفيد للي هيتخصص في نقد الفنون دي، بس برضه مش دور الصحفي إنه يكون ناقد أكاديمي يعني، وإنما الصحف الأدبية والثقافية بتفرد صفحاتها للنقاد الأكاديميين عشان ينشروا نقدهم، وإنما دور الصحفي تغطية الأحداث نفسها أو كتابة رؤية انطباعية عن الموضوع مش أكتر

الفصل الوحيد اللي كان مهتم بالكتابة الصحفية نفسها هو الفصل الأول اللي بيتكلم عن الصحافة نفسها فعلاً، ومع ذلك كان أقصر فصل

أكتر فصل كان دمه خفيف في الكتاب هو فصل الموسيقى، الكاتب اللي اشتغل عليه كان طول الوقت بيوجه كلامه مباشر للقارئ وكإنه في محاضرة لايف فعلاً، إلا إنه في نفس الوقت أكتر فصل متكلمش عن الصحافة خالص لا من قريب ولا من بعيد، ده حتى ساب الصحافة نفسها وبقى يتكلم عن دور مدرس الموسيقى مع الأطفال في المدارس، ومش فاهمة إيه علاقة ده بمنهج دراسي لطلبة إعلام هيخرجوا يشتغلوا صحفيين مش مدرسين موسيقى يعني؟!

لكن في الآخر الكتاب نفسه بعيداً عن التشتت في الهدف من محتواه هو نفسه وجبة دسمة جداً ومشوقة وممتعة وأنا لو عليا مكنتش عايزاه يخلص أساساً من كتر استمتاعي

وفي نفس الوقت كنت عايزاه يخلص عشان ورايا شغل عايزة أخلصه ومش هفضل في أم الماجستير ده للأبد يعني 😁

#الصحافة_الثقافية لمجموعة مؤلفين- تحرير: #صالح_مشارقة

#جولة_في_الكتب #كتب_إعلامية

#مقالات #سارة_الليثي