الشركات بجميع أحجامها، صغيرة وكبيرة، تأثرت (وحتضل تتأثر لفترة) بسبب فايروس كورونا، وهاد الشي عمل تغييرات كبيرة جداً بوقت قصير جداً بطبيعة التسويق والإعلان لكل الشركات. حبيت أعطي ملخص لشو عم بصير في هاد المجال، واللي ممكن أي شركة تقرأ المعطيات وتتصرف حسبها:
الصرف على الإعلانات (على الإنترنت) قلّ بشكل كبير، حسب الدراسات، أكثر من 50%.
الصرف على الإعلانات بشكل كلي (تلفزيونات، راديوهات، لوحات، إلخ) كمان قلّ بشكل جداً كبير.
عدد البوستات من الشركات (Organic)زاد كمان بشكل كبير مقارنة بالأشهر الماضية، كمحاولة بديلة عن الصرف الإعلاني.
استخدام الإنترنت بشكل عام، ومنصات التواصل الاجتماعي بشكل خاص، زاد بشكل كبير كتير. مثلاً: منصات الأفلام والمسلسلات زادت زياراتها 33%، الألعاب 25%. البحث على جوجل على كلمات مثل "تمارين رياضية" زادت الضعف (عقبال ما أصير منهم)، "نشاطات الأطفال" زادت 4,000%!
المواقع الإخبارية ومواقع المحتوى زادت الزيارات عليها بشكل ممتاز، لكن للأسف هاي الزيادة في الزيارات ما رح تترجم لزيادة في الدخل، لإنه الشركات المعلنة ما بدها تربط إعلاناتها بالأخبار السلبية المتعلقة بكورونا.
بعض الاستنتاجات بناء على المعطيات أعلاه:
كشركة، خطأ إنه في الوقت الحالي توقف نشاطاتك الإعلانية والتسويقية كلياً. المنطق إنك تعمل Shift أو تغيير في نوعية الدعاية والتسويق. بدل ما تروج منتجاتك، المفروض تروج الجانب الإنساني عندك، وتكسب الناس بتوجهك الاجتماعي وجانبك الإنساني. راعي مشاعرهم وساعدهم بشكل أو بآخر.
بسبب نزول نسبة المعلنين على فيسبوك والإنترنت بشكل عام، هاد بنفس الوقت عمل نزول في أسعار الإعلانات CPC بين 25% - 50%، يعني بنفس الميزانية السابقة إنت ممكن تجيب ضعف النتائج، وهاي قد تكون فرصة كبيرة لبعض الشركات ممكن تستغلها.
بعد الخروج من الازمة (في أقرب وقت إن شاء الله) متوقع أسعار الإعلانات ترتفع أكثر مما كانت عليه سابقاً، لإنه كل بزنس، صغير ولا كبير، بده يعوض خسارته فرح يلجأ للإعلان والتسويق.
ميزانيات الإعلان على الوسائل التقليدية في الوقت الحالي ممكن تتحول للوسائل الإلكترونية، الي هي حالياً يمكن الوسيلة الوحيدة الي ممكن يوصلوا فيها للناس.
كل شركة لازم تكون مبدعة Creative أكتر في الأفكار عشان تقدر توصل للناس بالشكل الصح في ظل زخم المنشورات هاي الفترة وزخم الأخبار الكبير.
الإعلان عن منتج كركوب للموجة في الوقت الحالي مش شي ينصح فيه، وممكن يبين كاستغلال، خاصة اذا فيه كسب مادي. كشركة محترمة إذا كان معك مصاري، توجهك أفضل يكون في مساعدة المجتمع، بطريقة أو بأخرى، لو بجزء بسيط.
طبعاً بعض النصائح أعلاه بتنطبق على الشركات المتوسطة والكبيرة. الشركات الصغيرة بدها حكي ثاني.
في منشورات قادمة، رح أعطي بعض الاقتراحات للشركات الصغيرة والكبيرة، كل على حدا، شو ممكن تتصرف تسويقياً خلال الأزمة، وشو أفضل محتوى ممكن تستخدمه.
