بنغنى على الربابة
وسط الضباع وديابة
ودبيب الدب المسعور
ام لسان ازرق وبنابة
عرى الشجرة والصبارة
كانت السما زرقا وبخيوط
والبلبل زقزق مبسوط
والتعلب عمال بيدور
وسط الزرعة بديل مربوط
وبينقش بانيابه اشارة
ينعق وش الصبح غراب
وينادى اصحوا يا اغراب
والفيل بينقرش بحوافره
وحدانى وملوش اصحاب
ديله مشبك قط بفارة
يمشى معانا الواد شرفنطح
متئنزح مرة ومتنحنح
ولسانه تملى بيئبح
لكن قلبه بيحكى كلام
وعيونه مليانة مكارة
جوا الدنيا هو ملكها
براها يعافر يشابكها
تقدر هى مرة عليه
مرة عليها هو يملكها
الاشطر يأكل بشطارة
يخبط تخبط خطا طابى
تيجى كعوبهم فى كعابى
مين بيشنكل كَعَّابِى
نلعب بصرة وبصارة
شنكل على باب العتبة
مسخوطة حافضة وكاتبة
مين الاغلب والغلبان
متكتف ولا بربطة
بسلسلة ولا دوبارة
التعليقات