يا زعيم اللحن كام نوبة رثيتك
وانحسر قلبى وانا بنظم رثاك
النهاردة اتغير الموقف وصيتك
أوجدك بينا ومن تانى حياك
يبقى تغيير لاعتقادى لو نعيتك
وانت حى وكأننا عايشين معاك
كل ما فيها إن جسمك غاب وبيتك
جنتك والروح ترفرف من علاك
قوم يا مصرى قلتها فى لحنك يا سيد
واهو قام المصرى يترحم عليك
إنت فٌتّه فى العبودية مقيد
فك قيده ودا أحب شئ إليك
الجلاء شامل وابن الشعب شيد
مجد وطنه دون منازع أو شريك
آه ياريتك عشت لليوم ده تعيد
آه ياريتك شفت ثورتنا بعينيك
