عيل مبربر متكدَّر وبيزمجرْ
مسحوب من ودانه على الأرض يتجرجرْ
تقلش زًرع بصل ولا شوال بنجرْ
اهى دى الرباية يا خلق يا سامعين
وفى المدارس ذنِّبوه ساعتين
أصل أبوه اتعذر مدفعش له قسطين
إيه ذنبه هوَّا يا هُوه يقف ويتمسخرْ
وآدى العَلام يا ناس.. خليكوا شاهدين
وفى التجارة شطارة حكمة وعارفينها
فسيبوه مدرسته من كتر مصاريفها
وقالوا غُمَّة مسيره هتعدى ربك هيكشفها
وآهِى دِى المعايش يا خلق، والمعايش طين