السلام عليكم، الإخوة الذين سألوني
تبعني وسأشرح لك بالتفصيل
البطاقتين كليهما يقدمون نفس الخدمة وهما يعطونك عنوان بنكي تستلم فيهما الأموال من أي بنك بالعالم وكذلك يعطونك بطاقة فيزا VISA لتشتري عبر الانترنت بسهولة تامة وتفتح حساب بايبال مفعّل بالكامل.
ما هي شركة وايز wise؟
ترانسفير وايز هي شركة حوالات دولية ذات حلول مبتكرة لتحويل الأموال، فهي تركز على جعل أجور التحويلات المصرفية معقولة أكثر من البنوك التقليدية من خلال فرض رسوم تحويل منخفضة وشفافة، والتحويل بمتوسط سعر الصرف الحقيقي في السوق
ما هي بطاقة بـايسيرا Paysera؟
مؤسسة مالية إلكترونية دولية مرخصة من قبل بنك ليتوانيا بدأت نشاطها من سنة 2004، تقدم مجموعة من الخدمات للحسابات الشخصية والتجارية كالدفع للمتاجر الإلكترونية يوفر الكثير من الخدمات الإلكترونية التي تسهل عليك التداول والشراء عبر الإنترنت وأيضا يقدم فيزا كارد (Visa Card) تغطي جميع الدول العربية.
ما الفرق بينهما؟
كليهما يقدم تقريبا نفس الخدمات ولكن يختلفون في المميزات، تبع معايا:
بايسيرا: توفر لك ارسال واستقبال الأموال ولكن بما أنه أوروبي اذا يتعامل فقط بالأورو ولا يستخدم أي عملة ثانية. تقولي كيفاش والتطبيق نفسه فيه عفسة "تغيير العملة"!
أقلك نعم، العملة الرسمية للتطبيق هي الأورو وهو فقط يظهر لك أموالك بعملة ثانية بمعنى الاستقبال من الدولار للحساب يقوم البنك بتحويلها لك حسب سعر الصرف نتاعو ولي تكون مش مضبوطة (يعني يربح فيك شوية عند التحويل) ولكن عموما لي يدخل دراهم بزاف يحس ليها شوية (شوية برك)
الأمر الآخر التحويل من خارج أوروبا تكون فيه cost أو تكلفة لا أدري بالضبط (أظن 3يورو) لكن حطها مليح في حساباتك هذه المعلومات ممكن في أي لحظة تتغير. وعلى فكرة التحويل من خارج أوروبا لم ينجح معي 3 مرات وكاين إخوة نجحت معاهم.
خطورة بايسيرا: عندها صرامة بالغة حتى سمطوها (طبعا لي ناس مطبقتش القوانين تاوعها)، كن يشمو منك ريحة البيتكوين أو بلاك غي في قلبك يوقفوهالك وأنت تبكي دون تراجع. ومصير الأموال الله أعلم أنت وزهرك كي تهدر معاهم.
طيب نجو لحبيبنا الآخر،
بطاقة Wise: الحلو الخطير، علاش قلت خطير باسكو مميزات تاعو لا تعد ولا تحصى مي يخوّف على حسب واش قالوا إخوة آخرين عن نفسي لم أجد أي مشكلة منذ سنتين! المميزات تدعو كالآتي:
- 1- سهولة تحويل الأموال بأي بنك في العالم، الموقع يوفر لك عنوان بنكي في كل دول العالم (بعض الدول مثل جزائر غير موجودة لكن المغرب موجودة).
- 2- بأقل تكلفة ممكنة وبدون رسوم خفية، بمعنى سعر الصرف تع العالم كامل يحولك بيه يا ربي تفوت مليون دولار. عادي جدا مكانش رسوم مخفية غير في التحويلات فقط من بنك لبنك آخر مختلف
- 3- حماية عالية، يعني البطاقة تاعك أصلا مفيهاش أرقام تخاف عليها. كلشي من تليفونك تتحكم فيه
الخلاصة:
كليهما يقدمون نفس الخدمة لكن في المميزات +1 لبطاقة وايز
مساوئ كليهما
لا يشحنون البطاقات visa للجزائر بصح الحمد لله التسجيل عادي برقم الجزائر.
وش معناها دون وسيط؟
درك نخبركم بمعلومة، كاين لي يتفق معايا وكاين لي والو. بصح كاين أمر خطير جدا يجب تعرفوه، بصح خلينا نعرف معنى الوسيط!
الوسيط هو شخص مقيم بفرنسا ساكن في دار وعندو عنوان إقامة واحد (شخص وليس شركة) برقم بيته تقوم أنت إرسال البطاقات إليه منبعد هو يرسلهاك للجزائر (صفحات فيسبوك لي راهي تقدم خدمة طلب البطاقات). معليش الأمر عادي لهذه اللحظة.
وين خطورة الوسيط!
الخطورة أن بنك بايسيرا لو أحد يعمل مشكلة كبيرة ولا تطرطيقة راحو فيها كامل لي يخدمو بنفس العنوان! أنعم سيدي كيما سمعت والله كامل تتغلق بطاقاتكم البنكية لأنها معرفة بعنوان واحد لمنزل شخص لا يتغير مالا تتحاسبوا كامل ومكلفه تقولو أنا خافيني وبلاك متصراش ياو كاين عنوان واحد مسجل بيه 10 آلاف بطاقة عاجلا أم آجلا والله غي يروحو فيها كامل! (المعلومة للتأكيد راهي في يوتيوب جزائري زار مقر بايسيرا وحاولو على هذه) تقدرو تحوسو على الشخص الجزائري في جوجل
كيفاش نطلب بدون وسيط!
تقولولي راك خلعتنا، مكانش مشكل درك كاين حيلة ثانية، نفتحو "عنوان إقامة فرنسي مجاني" خاص بنا عند شركة مسجلة رسميا في أوروبا -ابحث في جوجل- أو بالأحرى هذه الشركات مصنفة ضمن خدمات postbox وكل عنوان يكون مختلف عن الآخر برقم خاص به (ركز في هذه مليح كل عنوان له رمز مختلف). باه كي تصرا الضيقة يكون كل واحد مختلف عن الثاني والأمر الآخر لما تتحقق بايسيرا تلقى الشركة مسجلة رسميا لا علاقة لواحد بالآخر. كل واحد يطلب بطاقة على عنوانه أو كل 10 بطاقات بعنوان واحد. وهكذا. حوس في جوجل "عنوان فرنسي مجاني" واحرص فقط تكون شركة مسجلة ورسمية.
كاين شركة بورساي Porsay الفرنسية تقدم لك خدمة عنوان فرنسي مجاني أطلب معها حسب علمي كاين هي وكاين شركة بريطانية لم أجربها صراحة. جربت مع بورساي برك.
في هذا الرابط:
دايرة مقالات بشرح بالصور كيفاش تطلب عن طريقها من بطاقة بايسيرا أو wise وتشحنها إلى الجزائر.
هل تفعل البطاقتين تفعّلان بايبال؟
نعم كليهما يفعلان بطاقتي بايبال تفعيل كامل وليس جزئي، لأنه بطاقة ماستر كارد تفعلك تفعيل جزئي يعني في حسابك بايبال تشري برك بصح لا تستقبل أي أموال وهذه مشكلة عويصة للناس الي راهي تخدم فريلانسر مع الشركات متقدرش يرسلولك.
نتمنى نكون افدتكم.
