A.R.M

#الأفلام_التاميلية عادة بتكون حلوة وفيها قصص وأبعاد مختلفة

بس نهاياتها بتكون غريبة الأطوار

اللي هو أيوة ماشي وبعدين يعني

لا منها نهاية مفتوحة ولا نهاية مقفولة ولا عرفنا الدنيا قفلت ع ايه كدة

وملفات كتير مفتوحة المفروض الشخصيات يعرفوها يعني، بس لا الفيلم بيخلص وهم ميعرفوهاش واحنا بس اللي عارفين الحقايق كلها

نظرياً هو ده واقعي وبيحصل في الحقيقة

يعني في حياتنا الحقيقية احنا فيه حاجات كتير بتحصل وحصلت في ماضينا ومنعرفش أسبابها ولا ايه كانت الدوافع اللي خلت ناس معينة يتصرفوا تصرفات معينة أو فيه أحداث بعينها حصلت في الماضي بطريقة غامضة وممكن أجيال تعيش وتموت ومتعرفش حقيقتها

في حين لو افترضنا ان حياتنا دي معروضة على أشخاص آخرين غيرنا من كل جوانبها، هنفترض مثلاً زي الجن والملايكة اللي قادرين يشوفونا طول الوقت ويشوفوا الناس اللي احنا مش شايفينهم؛ فبيبقى عندهم الصورة الكاملة عن حياتنا في حين احنا معندناش الصورة دي

ده نفس اللي بيحصل في فيلم أو رواية تقفل على إن الأشخاص معرفوش الحقيقة الكاملة في حين إحنا عارفينها

بس لما نبقى بنشوف فيلم بنبقى عايزين الأشخاص يعرفوا الحقيقة ونعرف رد فعلهم ساعتها عليها هيكون ايه؟ وإزاي الحقيقة دي تقدر تقلب كل الموازين وتغير كل الحسابات

احنا مبنقبلش إن يكون في حقايق متخبية عننا وده لو بيحصل في الحقيقة فهو بيحصل دون علمنا فمبنقدرش نتقبله في فيلم أو رواية لإننا بنشوف نفسنا في الموقف ده، ومبنكونش حابين اننا نعيش في ظلمة الجهل كدة

#ARM

#أفلام_تاميلية #أفلام_هندية

#أفلام

#سارة_الليثي