هحاول أشرح بإيجاز كل موقع فيهم ممكن نستفيد منه إزاي
1_
الموقع ده بيساعدك تحسّن من الأكسنت "اللهجة" بتاعتك عن طريق إنك بتسمع مقطع صوتي أو كليب لاغنية ما -تقدر تختارها انت بكل سهولة- وأثناء ما انت بتسمع بيخفي كلمات معينة ويخليك تكملها عشان يعرف انت بتسمع كويس ولا بتسمع غلط وبيقيمك بالنقط عشان تعرف مستواك عامل إزاي وتبدأ تنافس أصحابك اللي بيتعلموا معاك لو معاك أكاونت عليه وتبدأ تتدرج في المستويات اللي موجودة فيه من البداية لحد ما تبقى Native.
دي أول حاجة لازم تتأكد منها لما تحب تبدأ تتعلم إنجلش "إنك تتعود تسمع كويس وتفسَّر الكلمات برغم إختلاف نطقها عن اللي انت متعود عليه" لو هنتكلم يعني على حد لسة هيبدأ الطريق من أوله وده اللي أنا شخصيًا بفضله عشان كل ما بتبدأ صح كل ما بتسهل على نفسك أكتر
2_
http://speaking24.comبعد ما تسمع فترة كبيرة وكافية انك تقدر تفهم أغلب الجمل لوحدك حتى لو كانت صعبة، وده اللي هتوصله عن طريق الموقع الأول، نيجي بقى للخطوة التانية، زي ما سمعت كتير لازم تبدأ تتكلم كتير عشان تتعود على الكلام بتلقائية وعفوية واللغة تدخل عقلك اللاواعي وتبقى كأنها لغتك اللي بتتكلمها من وانت صغير، فكرة الموقع ده انك بتدخل بياناتك وتسجل اللغة اللي عاوز تتعلمها وتدور على حد في مكان تاني هو كمان عاوز يتعلم نفس اللغة بس مش لاقي حد يساعده "بائس زيك يعني" هتتفق معاه على وقت معين تتكلموا فيه على سكايب أو عن طريق أي وسيلة تواصل مناسبة ليكم انتوا الاتنين وتبدأ بقى تحسن من الأكسنت بتاعتك معاه وتساعدوا بعض بدون رهبة لأنكم انتوا الاتنين بتتعلموا زي بعض !
3_
الموقع ده مميز جدًا لأنه بيقدملك أي محتوى انت عاوزه في صورة فيديوهات، عاوز Pronunciation تلاقي، عاوز Idioms تلاقي، عاوز Grammar تلاقي، أي حاجة تخطر على بالك وبشكل بسيط وأنا شخصيًا بفضله عشان ال Teachers اللي موجودين عليه كلهم مبدعين بصراحة ومتميزين، وكمان مميز لأنه بيركز على الكيف وليس الكم، عن نفسي بحب أتابع بنت اسمها Molly لأنها مميزة جدًا في شغلها لدرجة انك مبتحسش بالوقت وانت بتتعلم منها، و في كمان Robin طريقته متميزة برضه
- ملحوظة: ينفع تتابع أي Teacher منهم لوحده وتشوف كل المحتوى اللي هو مقدمه وتشتغل عليه لو ارتحت ليه أو لطريقته زي ما حصل معايا
4_
الموقع ده المميز فيه انك تقدر وانت بتسمع أي محادثة بين اتنين في فيديو -لأن أغلب المحتوى بتاعه في صورة محادثات ودي برضه حاجة مميزة- وانت بتسمع بتلاقي اللي هما بيقولوه موجود تحت الفيديو مكتوب عشان تعرف تتابع الكلام لو انت لسة مبتدئ أو عشان تعرف الكتابة الصحيحة لأي كلمة تشك فيها وانت بتسمعها أو تعرف تسيرش عليها بسهولة لو انت أول مرة تسمعها أصلا
5_
https://learn.livemocha.comالموقع ده أول حاجة تعملها عليه تسجل وتعمل أكاونت عليه، ده شرط أساسي عشان تستعمل الموقع لأنك هتفاجئ انه موقع تواصل إجتماعي بس في مجال معين وهو تعليم الإنجليزي، ممكن تضيف أصدقاء من أي مكان في العالم وتتواصل معاهم، وكمان الموقع بيستخدم ال Gamification أو "مبدأ التلعيب" وده مبدأ مشهور جدًا بس هو جديد وهو انه بيدخل الألعاب في أي حاجة انت عاوز تعملها عشان متملش منها وتحس فعلَا انك بتعمل حاجة كترفيه مش كمسئولية عليك ودي من الحاجات اللي بتخلينا نخاف ونكسل واحنا مش واخدين بالنا، هو بقى بيحلها، هتحس إنك بتلعب مش بتذاكر، هيعجبكم إن شاء الله.
أخيرًا إقرأ لكلمتين دول بتركيز، طبعًا المواقع دي ما هي إلا خيط بداية بس للي فعلًا عنده شغف بس مش عارف يبدأ منين، واللي عاوز يكمل فعلًا وصادق مع نفسه هيلاقي مئات بل آلاف المواقع اللي ممكن يتعلم منها وممكن تكون أفضل من المواقع دي بكتير طبعًا بس الموضوع مش سهل، ومش صعب ! أيوة الموضوع كله في الإرادة والشغف
*نصيحة عامة في الحياة، خلَّي عندك #هدف في أي حاجة بتعملها، لأن كل ما كان هدفك من ورا الحاجة اللي بتعملها دي قوي كل ما كانت إرادتك قوية، لأن الإرادة بتستمد قوتها من قوة الهدف والدافع ليه
آخر حاجة دي بعض النصائح البسيطة اللي "لازم" تعملها لو عاوز تتعلم صح
1_ متفكرش بالعربي، ولو بتسجل اللي بتذاكره في نوت ولا حاجة إوعى تترجمه بالعربي لأنك لو عملت كده عمره ما هيدخل عقلك اللاواعي
2_ إبعد عن القواميس أيًا كان نوعها وحاول توصل لمعنى الكلمة من نفسك الأول، لو معرفتش استخدم قاموس إنجليزي إنجليزي
3_ أبوس إيدك إنسى ترجمة جوجل نهائيًا
4_ كل ما هتسمع أكتر كل ما هتتكلم أسرع
5_ إبعد عن اللينكات الكتير والبوستات الكتير لأنها بتشتتك مش بتساعدك، عن تجربة
أخيراً: إذا عزمت فتوكَّل على الله.
التعليقات