بعضكم هيستغرب ايه اللى جاب اليوم العالمى للصيدلى دلوقتى، بس حبيت اذكركم بدور الصيدلى فى المجتمع.

تخيل العالم بدون صيدلة كان ممكن يبقى ازاي:

  • مكناش هيبقى فيه كوكاكولا: لان اللي اكتشف الكوكاكولا صيدلي اسمه جورج بمبرتون.

  • مكنش هيبقى فيه نص منتجات السوبرماركت والادوية وادوات العمليات: صيدلي فرنساوي اسمه باستير اخترع ازاي ممكن نعقم الادوات وبعد كده ازاي نبستر اللبن و تقريبا كل اللي بنشتريه من السوبرماركت معتمد على طرق باستير في التعقيم (البستره) وطبعا مكنش هيبقى فيه تعقيم مثلا في العمليات وعيادات الاسنان.

  • مكنش هيبقى فيه مضاد حبوي: صيدلي اسمه الكسندر فليمنغ اكتشف البنسلين وبسبب كده تلافينا ملايين الوفيات ... العدوى البكتيرية البسيطة اللي بتيجي للاطفال وبنديها مضاد حيوي بسيط والاطفال بتخف كانت قبل فليمنج بتموت بنسبة عالية.

  • كانت الملاريا قتلت نص سكان افريقيا: لان صيدلي اسمه ساتوشي أمورا مع وليام كمبل اكتشفو دوا للملاريا واخدو نوبل بسبب كده.

  • كانت الناس هتموت من الوجع: صيدلي الماني صاحب مزاج اسمه فريدريك سيرتورنر استخلص المورفين من من زهرة الافيون وبسببه بقى عندنا مخدر للعمليات وتسكين الالم.

  • كان اي حد يقرصه تعبان او عقرب هيموت غالبا: لولا صيدلي اسمه جابر بن حيان اكتشف فكرة المصل وتأسيس علم السموم.

  • مكنش هيبقى فيه تصنيف للاعشاب وكيفية استخراج المواد الفعالة من النباتات: لان صيدلي اسمه بن البيطار عمل الفارماكوبيا (الجامع لمفردات الأدوية والأغذية) والرازي اسس علم العقاقير والاستخلاص.

  • مكنش هيبقى فيه تحنيط: لان صيدلي وطبيب فرعوني اسمه أمحوتب اكتشف طريقة حفظ الانسجة من التلف وسر التعفن البكتيري.

  • مكناش قضينا على الاوبئة الفيروسية القديمة زي شلل الاطفال: وده بسبب اختراع الصيادلة لفكرة اللقاح.

  • كانت نسبة الوفيات من كورونا تضاعفت: وده محصلش بسبب البرتوكولات الدوائية المستخدمة خصوصا فالحالات المتقدمة من المرض.

  • وطبعا مكنش هيبقى فيه اقتصاديات الدواء ولا علم انتشار الاوبئة والامراض الدوائي اللي سهل حصر اعداد المرضى وكيفية توفير الفلوس لعلاج امراض كتيرة.

  • ومكنش هيبقى فيه الدراسات السريرية ومراحلها اللي بنتكلم عنها دلوقتي كل يوم.

  • مكنتش وزارات الصحة هتعمل اي ايرادات مالية: في دول كتير زي مصر وزارة الصحة فيها بتاخد مخصص مالي من وزارة المالية وبتصرفه كله والايراد شبه الوحيد هو القطاع الصيدلي اللي كان بيتورد للمالية... وطبعا ده انتهى لان الصيدلة بقت قطاع لوحده (هيئة وزارية) ممثلة في هيئة الدواء المصرية وهيئة الشراء الموحد.

اللستة اللي فوق دي ممكن تستمر بعدد كل دواء موجود فالمستشفيات والصيدليات

ببساطة عالم بدون صيدلة هو عالم بدون دواء ... عالم عاجز قدام اي عدوى بسيطة وكان متوسط عمر الانسان هيبقى اقل من 40 سنة.

والان والعالم كله ينظر الى الصيادلة في انتظار اكتشاف لقاح لكورونا... واجب نعرف بدور الصيدلي في شتى المجالات ونوجه تحية لكل الصيادلة اللي:

  • بيتصرفوا دايما في النواقص في ظل ازمة الدواء اللي بتكرر كتير وخصوصا وقت الكورونا.

  • اللي من جواهم nerds ومن برا لابسين احسن براندات ومهتمين بنفسهم وبيعرفوا يتكلمو ويبيعوا اي حاجة.

  • اللي بيديروا تاني اكبر صناعة فالعالم بعد السلاح وهي الادوية.

  • اللي بيديرو المؤسسات البحثية الكبرى.

  • اللي استحملة يذاكرو 20 نوع مختلف من الكيمياء ومسقطوش في الكوجنسي (Cogno) وال (medicinal chemistry) او اللي كنا بنسميها زمان ceutical.

  • الي ميزهقوش لما تدخل الصيدلية ترغي معاهم وتستريح في الرغي معاهم .

  • اللي بيستحملوا يتقالهم يا ابلة ويا كوتش وبيتقلبوا فجأة لمعلمين لما يدخلهم البلطجية والمدمنين ويعرفوا يطردوهم من الصيدلية 😎.

تحية لبتوع الكيمياء في اليوم العالمي للصيادلة

كل سنة وانا وانتم كلنا طيبين

(25 سبتمبر 2020) اليوم العالمي للصيادلة