ابتزاز الفريلانسرز بروشتة 'شات جي بي تي': كيف تحول الذكاء الاصطناعي لأداة استغلال علني؟

معضلة أصحاب الأعمال الذين يطلبون خططاً إعلانية وجهود فريق كامل قيمتها الحقيقية تفوق الـ 1000 دولار، ويتوقعون تنفيذها بـ 100 دولار فقط لأن 'الـ AI حكى هيك'!

من أكبر المهازل والتحديات اللي بنعيشها كفريلانسرز هالفترة، هي 'وهم السوبرمان الرقمي' وابتزاز أصحاب الأعمال للمستقلين باستخدام الذكاء الاصطناعي.

العميل صار يدخل على الـ AI، ويطلب منه يكتب له المهام والنتائج المتوقعة من مختص (مثلاً مختص إعلانات أو تسويق). طبعاً الذكاء الاصطناعي بيعطيه قائمة مهام ضخمة وتعجيزية بتشغّل فريق كامل، وبيوعده بنتائج خيالية وغير واقعية بالمرة، خاصة بالنسبة للمدة الزمنية المطلوبة والميزانية المعروضة!

الصدمة وين؟ إنه العميل بيعتبر كلام الـ AI مقدّس ومرجع أساسي، وبيحط المستقل تحت المجهر بناءً عليه. والأسوأ من هيك، إنه حاطط تسعيرة للمشروع كله 100 دولار بس! وإذا المستقل حاول يفكك هالوهم ويفهّمه الواقع، أو إذا ما حقق النتائج الخرافية اللي تبرع فيها الذكاء الاصطناعي، بتبدأ النزاعات والمشاكل والاتهام بالتقصير.

للأسف، في ناس تحت ضغط الحاجة والوضع الاقتصادي بتقبل بهيك شروط واستغلال، وهذا اللي بدمّر السوق. كمستقل، أنا برفض تماماً إنه يتحول الذكاء الاصطناعي لأداة تظلمنا وتبخس تعبنا وتخلق توقعات وهمية، ولازم هاد الموضوع يتناقش وينحط له حد.

لما صاحب الشغل يواجهني بـ 'الروشتة' اللي كتبها الذكاء الاصطناعي، ردي عليه بيكون واضح

: أنت حولت الـ AI لمدير فاشل!

الذكاء الاصطناعي أداة مساعدة للمستقل عشان يسرّع إنتاجيته، مش أداة بإيد الإدارة عشان تخلق 'توقعات وهمية' وتضغط المستقل نفسياً وعملياً بمهام تعجيزية. الـ AI ما بيعرف حجم الضغط النفسي، ولا الصعوبات التقنية الواقعية، ولا خوارزميات المنصات اللي بتتغير كل يوم. لما العميل يعامل الآلة كمدير بشري، هو بيمارس تزييف للواقع وضغط غير إنساني على المستقل.

وهنا في سؤال منطقي وفيه تحدي بيفرض نفسه على كل عميل بيستخدم هاد الأسلوب: لو أنت كصاحب عمل مقتنع تماماً ومؤمن بقائمة المهام والنتائج الخرافية اللي أعطاك إياها الذكاء الاصطناعي.. ليش ما تخلي الذكاء الاصطناعي نفسه ينفذها؟

خلوه هو يمسك الحملة الإعلانية، وهو يحلل النتائج، وهو يكتب المحتوى ويصمم، وادفعوا له الـ 100 دولار! ليش بتنزلوها للمستقل البشري وبتحملوه فوق طاقته؟

الجواب: لأنكم بتعرفوا إنه الآلة بتعطي حبر على ورق، والجهد البشري الإبداعي والخبرة الحقيقية هي اللي بتنفذ على أرض الواقع، والخبرة إلها ثمن.

بعد كل اللي حكيناه، هاد الواقع مش مجرد نظريات.. هاد سوق شغال وضغط بنعيشه كل يوم. وعشان نكون منصفين ونشوف الصورة من كل الزوايا، حابين نفتح الباب للنقاش ونسمع منكم تجاربكم الحية:

  • إنتوا كـ فريلانسرز ومستقلين: شو أغرب أو أصعب المواقف اللي واجهتكم مع عملاء من هاد النوع؟ وهل وصلت معكم لمرحلة إنكم خسرتوا عملكم أو انفسخ العقد في نص المشروع لأنكم رفضتوا تنساقوا ورا أوهام الـ AI؟
  • وفي نفس الوقت، بدنا نسمع الطرف الآخر بكل صراحة وعقلانية.. إنت كصاحب عمل: هل فكرت بـهالمنطق بيوم من الأيام؟ هل لقيت حالك منساق (بدون ما تقصد) ورا افتراضيات ومخرجات الذكاء الاصطناعي، وصرت تشوف إنو طلباتك منطقية لمجرد إنو الشاشة حكتلك هيك، واكتشفت بعدين إنك كنت ظالم للمستقل؟