Sat , 20, Nov

هاد التاريخ كان اخر يوم للقرار يلي اخدتو إني احذف الفيسبوك لمدة 30 يوم لأنو بعد ما شفت وثائقي The Social Dilemma تحمست للفكرة و لما شفت شو هيي التطبيقات يلي بتاخد من وقتي أكتر شي طلع الفيسبوك و الانستغرام لهيك تحديت حالي إني بعد عنو لمدة شهر

بعرف إنو الفكرة مستهلكة و التحدي قديم بس حسيت هلق صار لازم اعملوا

الوثائقي عم يحكو فيه ناس كانو بيشتغلو بشركة فيسبوك،تويتر، انستغرام، و غيرن....

عم يحكو كيف هنن بيدرسو تحركاتك و اهتماماتك و بطلعولك منشورات عنن لحتى أنت تقضي أكبر وقت بالتطبيق فبتالي أنت عم تشوف أكبر قدر من الإعلانات فهيك هنن ربحانين مصاري من وقتك

هي غير لما أنت تنزل صورة أو ستوري و يصير عليها تفاعل فا دماغك بيعطيك شعور بالمكافأة.... يعني كمان في لعب من الجانب النفسي لحتى توصل الإدمان

خلينا ما ننكر إنو ممكن لمواقع التواصل الاجتماعي يكون إلا منافع علينا سواء بالمعلومات "يلي لازم نتأكد من مصدرا" أو شغل أو تواصل مع ناس بعيدة أو تتعرف على ناس جديدة.... حتى ممكن تلاقي شغل منه

بس لما تشوف إنو الشي السئ أكتر من الشي النافع فااا صار لازم تاخد بريك منن و تشوف حياتك شوي بعداً عن مواقع التواصل الاجتماعي

⚫حياتي بدون انستغرام و فيسبوك:

⚪أول شي بتحس ال 24 ساعة هنن كتير كبار و فينك تلحق كلشي فين و ما تأجل شي لبكرا

⚪تركيز مضعف: تركيزي زاد بشكل عام خصوصاً آخر فترة قبل ما احذفو كان تركيزي معدوم و دائماً متشتت

⚪قدرة على انك تمارس هواياتك و تطورها: حطيت هدف إني اقرأ 10 كُتب خلال شهر (بعرف العدد قليل بس لا تنسوا إني بكلوريا) و قدرت أنجز الهدف لأنو عندي وقت أكبر

بالإضافة إني سمعت podcasts أكتر و ضفت معلومات جديدة عن الشغلات يلي بحبا

⚫في شغلات كانت سلبية

ما بنكر إنو بتحس في شي ناقص و فراغ كبير بالبداية و بتحس بدك ترجع بس هاد الإحساس خف وقت مليت وقتي بالقراءة، الكتابة، الدراسة، البودكاست و المعاهد

بالنهاية كانت تجربة لزيزة بالنسبة إلي، ضافتلي شغلات جديدة و خلتي اتعلم نظم وقتي و أثبت لحالي إنو مواقع التواصل الاجتماعي ما ممكن تسيطر عليي و حسيت حالي حر

إذا تحمست للفكرة و عندك شي عم تأجلو وحابب تعملو، تطور حالك و تحس حالك حر أو حتى تعبت من المثاليات يلي بتشوفا عالفيس بوك و الانستغرام

فا بنصحك تاخد هاد القرار و رح تلاقي فرق أكيد

و إذا كنت أخد هالقرار قبل حكيلي تجربتك