انا و الكورونا
حتة على ما قسم
فى البداية احب انوه لكم ان كل واحد له نصيب فى اى حاجة بتحصل معاه، وعشان كدة نقطة ومن اول السطر....
مايو ٢٠٢٠
الكورونا كانت فى الفترة دى بتنتشر جدا بين الناس ولعدم وجود معلومات حقيقية كافية عنها كان الناس عندهم هلع ورعب شديد لدرجة انهم كانوا بيعتبروها نوع من العار وان الشخص اللى بيتصاب بيها -الكورونا- يبقى فى نظرهم منبوذ ، بدون مراعاة لظروف حالته النفسية ، وفعلا طلعت الاشاعات وغطت البلد عن ناس معينة الكورونا هاجمتهم وان الامن محاصرهم والجيران سابت البيت بسببهم ، المحزن جدا اثناء الازمة دى فى ناس عزيزة عليا جدا اتصابوا بيها وناس تاتية كتير معارف وناس اكتر الواحد ما يعرفش عنهم حاجة ، المحزن جدا انى ما قدرتش اساعد حد فيهم لظروف شغلى آخر الدنيا...
الدنيا مشيت شوية والناس بدات تخف والاخبار بدات تكدب الاشاعات عن عدد الحالات المصابة .
يونيو٢٠٢٠
ع الزيرو فى حد يعمل كدة ؟
ده تحديدا كان سؤال بنتى لما شافتنى حلقت شعر راسى ، وده كان آخر يوم فى أجازتى .. المهم ركبت القطر و روحت الشغل ، كنت كل يوم اقعد العب تمارين سويدى وشوية حديد بعد الشغل و ده قبل النوم تحديدا ،،،
فى الشغل سمعنا ان بعض قرايب زمالينا اتصابوا وكنا نسال من بعيد لبعيد لدرجة ان واحد زميلنا حماه توفى والناس قالت وفاته نتيجة كورونا ...
قعدنا معاه وسالناه بود والراجل قال ان قرايبه فعلا اتصابوا بس حماه توفى طبيعى جدا ...
يومها دى تحديدا واحد زميلنا قال يلا بينا نتصور محدش عارف هنكون فين بعد شوية واتجمعنا وعملنا هاشتاج اسمه #اللى_يعرف_الحقيقة_يقولها. واتصورنا كلنا ....
الدنيا مشيت تمام وحلو قوى لغاية يوم ١٧ يونيو واليوم ده اول يوم بدات اشك فيه بالاصابة بالمرض ، ليه ؟ لان يومها انا بعد ما خلصت تمارين استحميت زى كل مرة بس الحرارة بدات تعلى بطريقة جنونية ومرة تختفى ، قلت ما بدهاش ، لما نشوف اخرتها وبدات اعزل نفسى من غير ما حد يحس، وفعلا نجحت فى كده ، على يوم ٢٠ يونيو فقدت حاسة الشم وكدة انا بقيت متاكد جدا ، شعور صعب جدا انك ما تعرفش تشم ....
كلمت الدكتور وقالى ربما دور برد والزكام عمل معاك كده زى ما بيحصل ، وانا اقول له كورونا وهو يقولى برد....
مع الوقت بقى عندى خمول بسبب الحرارة وهنا قررت اخد اجازة وكلمت الدكتور وقالى اعمل تحاليل معينة وعملتها والنتيجة كانت مدهشة......
الامانة والحزن
انا وراجع للبيت فى القطر طول السكة من اسوان لقوص كنت ارفض اقعد حد جنبى من خوفى اتقل لهم العدوى ، منهم راجل كبير فى السن ومعاه بنته ومجموعة شباب ومجموعة رجال .... المشهد اتكرر لحد قوص لدرجة واحد قالى لما انت عندك كورونا ركبت معانا ليه ؟
بصراحة اتضايقت جدا ، وفكرت انه لو كل حد قالى كده واتضايقت هطق من جنابى وممكن اتجلط مهى الكورونا بتجيب جلطات 😠
رجعت البيت دخلت المندرة ونمت لحد صلاة الظهر ، ومحدش يعرف من البيت انى جيت ، كنت خايف على اسرتى من الاصابة ، كنت خايف على والدى جدا ...
روحت عيادة الدكتور وهناك اكتشف انه اجازة ، وقعدت اتصل بيه لغاية العصر وساعتها صحى من النوم وطلب منى اعمل تحاليل للدم ... Cbc وcrp , عملت التحاليل والنتيجة طلعت مدهشة .....
يا فرحة ....
التحاليل طلعت ممتازة وده كان ع الساعة ٩ بالليل ، اتصلت بالبيت وبلغتهم انى كنت قاعد تحت لحد ما اعمل التحاليل وبلغت اخويا الكبير من البداية ، عديت ع اقرب سوبر ماركت واشتريت لهم حلويات وشكولاتات ، فرحة الولاد كانت كبيرة وعدى اول يوم ....
اليوم التانى نزلت الشارع واشتريت طلبات البيت لمدة شهر ع الليل نمت جنب عمر تنفيذا لامره ، حتى فجر يوم الخميس واليوم ده تحديدا كان تانى اطول يوم فى حياتى ، صحيت ع الساعة ٦ الصبح والحرارة عالية جدا ودايخ وعاوز ارجع ، دخلت الحمام لبيت نداء الطبيعة ولما قمت من مكانى ماعرفتش اقوم ...
ناديت بعلو صوتى ع اولادى وام اولادى محدش سمعنى ، اتسندت ع الخيطة لحد ما وقفت اغسل ايدى ع الحوض ، بصيت ف المراية ، شخص تانى ما اعرفوش وغبت عن الوعى تماما ، صحيت لقيت نفسى واقع فى الحمام والم رهيب فى ضهرى(شرخ فى ضلعين) ، قمت مفزوع من مكانى مش مصدق انى اغمى عليا وكل حركة بتولع ف ضهرى ، كحة ناشفة بتقلعنى من جدورى ، لميت اللى فضل من االى وقع ع الارض واتسندت تانى ع الخيطة فتحت باب اوضة الاولاد ومن كتر الدوخة روحت بالباب للاخر ، وده عمل خبطة جامدة فى الحيطة ، صحى عمر وام عمر مخضوضين ،لدرجة انى صعبت على ابنى وقالى معلش يا بابا ...
ع الساعة ٧ ونص كلمت الدكتور اللى قالى اعمل اشعة مقطعية ، صحيت صاحبى اللى ماسك مركز الاشعة وقالى تعالى ع الساعة ٨ونص .....
كنا كتير بنعمل اشعة وكل واحد بيبص للتانى وفهمت ساعتها ان الحالات اللى معايا معظمها كورونا ....
الدكتور طلب منى اصور له الاشعة وابعتها له ع الواتس من غير تقرير دكتور الاشعة ، والحقيقة اتا شوفتها وقارنتها بصور الحالات المنشورة ع النت وطلعت فعلا كورونا ........
عالليل روحت العيادة والدكتور كلمنى وقالى كورونا ، وقعدت اضحك ضحك هيستيرى والدكتور يقولى بتضحك ليه ؟ قلت له عادى ما جتش عليها يعنى ،وصرف لى العلاج مع التاكيد على النوم ساعات طويلة وعدم الاجهاد .. قلت له والسويدى ؟ قال مفيش سويدى .. بس انا كنت بلعب سويدى ف العزل .......
ورجعت البيت ع المندرة عدل ، كنت خايف ابلغ ابويا واحيبهاله ازاى ؟ فى شباب كتير مات بالمرض ده , كلمت اخويا وقلت له وكان باين ع رده اثر الصدمة ، كلمت بيتى وقلت لهم وانهاروا جميعا ....
حاولت اصبر نفسى بالقرآن وقرأت (قُل لَّن یُصِیبَنَاۤ إِلَّا مَا كَتَبَ ٱللَّهُ لَنَا هُوَ مَوۡلَىٰنَاۚ وَعَلَى ٱللَّهِ فَلۡیَتَوَكَّلِ ٱلۡمُؤۡمِنُونَ)
بس كنت اوصل لحد نصها وصوتى يتخنق وابكى وحاولت وحاولت لحد ما كملتها بعد عناء وبكاء وساعتها حسيت بشعور جميل جدا وعرفت انها مسالة وقت وهعدى منها وحسيت بالرضا ....
كان اصحابى ليهم دور فى محنتى منهم اللى جرى وجاب لى علاج الهيدروكسى عشان ما اطلعش من البيت واللى جرى وجاب لى عسل نحل ممتاز عشان احلى بيه المشروبات ، واللى جاب لى جهاز قياس نسبة الاوكسجين فى الدم واللى عملى منشورات بيدعيلى فيها واللى يكلمنى ويقولى انت دايما بتشجعنا وبتقف معانا بلاش تخذلنا وكل مكرونة عشان تغلب الكورونا 😀
مكالمات من عالم آخر.
بعض اتصالت الناس كانت مستفزة حبتين والسؤال اللى كان مضايقنى دابما هو الكورونا جاتلك منين وازاى ؟😠
ومكالمات بتقولى ده ابتلاء واصبر وهى محنة وجواها منحة ودى كانت بتفرحنى 🥰، ومكالمات وداع وكانى خلاص ماشى من ع البسيطة كام ساعة 💔
قررت اقفل موبايلى وما اردش ع حد ....
بابا والتعقيم | العائلة والناس
من زمان وبابا ملتزم جدا فى موضع العزل ده اثناء الامراض الشتوية زى الانفلوانزا وطلب من ام عمر انها تنزل لى الاكل فى اطباق فوم وكمان العصاير وبعد كل وجبة احط الاطباق فى كيسين واعقمهم بالكلور واحطهم فى الجردل المخصص....
وكمان جاب لى رشاش للحمام وحوض الغسيل وبقيت معقم تماما .
العائلة
لم تدخر جهدا فى توفير الرعاية لى بداية من أبى وإخوتى وآل بيتى ، كان اهى يأتى يوميا لقضاء حاحتى او مساعدتى فى أى أمر به تقصير ، كذلك أختى اصرت على الزيارة ومنعتها خوفا عليها وعلى أبنائها ، أما عمر واخته وامه فكانوا معى ليل نهار ، إفطار ،غداء ،عشاء وعصير ومشروبات ساخنة غير التى كنت اعدها بنفسى ، كنت استيقظ يوميا لإلقاء التحية على ابى وزوجته وآل بيتى عبر المنور ،حيث كانوا يبادلوننى التحية عبر النوافذ ، وكبشر عادى كنت أفقد أعصابى أحياناً وكانوا جميعا يرفقون بى بلا إستثناء......
يوميات العزل
كنت دايما اصحى بالليل وانام بعد طلوع الشمس ، شوية قرآن وشوية أذكار ، طبعا غير الصلاة ، فى العزل اتعرفت على الامام احمد بن حنبل والامام الشافعى وازاى كان بن حنبل زاهد فى الدنيا وازاى كان فقير جدا ، فى العزل وجدت السلام النفسى والسكينة والدافع تلو الدافع.....
على هذه الارض ما يستحق الحياه (محمود درويش).
فى العزل راجعت نفسى كثيرا جدا ، حتى اهتديت الى ان المرض هو منحة وليس محنة ، وجدت ما أبحث عنه وبحث عنى ذلك السلام .....
المسحة | الرعب القادم من العصا
اخ عزيز جدا على قلبى اتصل بيا وقالى روح المستشفى انا كلمتهم بخصوصك عشان تعمل المسحة وبإذن الله تطلع مسحة سلبية وجهز صور البطاقة واطلع على المستشفى دلوقتى ....
ع الساعة ٩ بالليل روحت المستشفى ولقيتهم فى انتظارى بس رد فعلهم بطئ جدا وكل ما اقولهم عاوزين ناخد المسحة يقولوا استنى شوية ، ولقيت هناك ناس بتغير انابيب الأوكسجين بتاع التنفس زى قزقزة اللب ، حمدت ربنا انى ما وصلتش للحالات دى ، ع الساعة ١٠وربع نادوا عليا عشان المسحة ، حاجة تشبه عصاية الودان بس طويلة وتدخل فى فتحة المناخير للاخر وعنيفة جدا للدرجة اللى دموعى نزلت معاها...
قالوا لى استنى يومين والنتيجة تطلع....
عدى النهار وراه نهار والنتيجة طلعت بس ايه لازم المسحة تتعاد تانى عشان ماوصلوش للنتيجة اللازمة....
بعد عشرة ايام روحت اعمل المسحة التانية وبابا ربنا يعطيه الصحة جهز لى الجوانتى البلاستيكى والكمامة ، المرة التانية نفس الصديق بلغ المستشفى بقدومى زى المرة الاولى وكل مرة كان هو نفس الشخص يبلغ المستشفى ويبلغنى بالنتيجة والمرة دى قابلت احد الاصدقاء معه والده وهو ايضا مصابا بالكورونا ، و اتكلمت معاه واقنعته بضرورة عمل المسحة لانه كان متردد وقلقان منها عملنا المسحات وصديقى تكفل بارسالها الى قنا بسيارته.....
كنت استعدت حاسة الشم خلال هذه الفترة وكان لول حاجة اشمها تسبيك الطماطم 😀
عدى اليومين وطلعت النتيجة .....
النتيجة ان المسحة لازم تتعاد تانى ، اتضايقت ، اتنرفزت ،اتعصبت ، بس فى النهاية قومت اتوضيت وصليت ركعتين وهديت زى ما يكون فى لوح تلج اتزرع فى صدرى 🕊️🕊️🕊️🕊️🕊️
بعد السلام الداخلى كلمنى اخويا محمد وقالى المستشفى طلبوا حضورك لعمل المسحة فورا ،قلت له ازاى ده لسه عشر ايام تانى .... قالى هما اللى. طلبوا يبقى تروح وخد معاك عربية عشان العينة تروح قنا...
عملت المسحة التاللتة وهناك فنى المعمل قالى والله اول مرة اشوف واحد بيعيد المسحات بالشكل ده ،كل خمس حالات بيطلع واحد سلبى والباقى ايجابى ..قلت له نشنت يافالح وقد كان
..
النتيجة للمسحة الثالثة ايجابية ... يعنى ايه ، يعنى لسه مكملين فى العزل وكان شعورى عادى جدا بل صليت ركعتين شكر لله والحاجة الوحيدة اللى زعلتنى ان اولادى كانوا فاكرين انه بعد المسحة التالتة راجع لهم وده كان دافع من دوافعى للتغلب على المرض ، الحاجة اللى كانت بتشجعنى على زيادة عدد المشروبات الساخنة التى كنت اعدها بنفسى ......
الجزء التانى م العزل
فى الجزء التانى من العزل اشترى لى والدى مكيفا حتى اتغلب على الحرارة اللى كانت فوق الوصف وقتها شهر ٧ والجو بيكون فيه مش طبيعى ،كمان اتعودت اشرب الميه من غير ما تكون ساقعة زى الاول ، بدأت كمان اخرج من البيت الساعة ٣ صباحا عشان اتمشى لغاية ما بابا قفشنى مرة ومنعنى من الخروج خوفا على الناس 😊
بدا الملل يظهر على لوجى وعمر وكل يوم يسألونى امتى هترجع يا بابا 😢دى الحاجة اللى كانت بتزعلنى جدا ..
كمان فى مرحلة العزل التانى كانت امى رحمها الله تزورنى يوميا كلما انام ، كانت احس بوجودها جنبى و اول ما اصحى تمشى للدرجة اللى مرة قعدت انادى عليها ياما استنى يا ماما استنى وقعدت ابكى زى الاطفال ....
ومن اجمل المواقف اللى حصلت فى الفترة دى لما روحت اعمل المسحة الاخيرة ، كان طقم المعمل مستنى اعمل المسحة وكان فنى المعمل متأثر جدا وقالى بإذن الله سلبية ، طولت معانا يا فهد ، المرة دى راح معايا فيها المستشفى صديق الطفولة والشباب ....
العيد| لجين
ام عمر قالت لى امبارح لوجى لما راحت تنام بكت كتير وقالت ازاى العيد جاى و بابا مش معانا 😢😢😢
لم يمض يومان حتى اعلنوا النتيجة طلعت سلبية وده كان يوم ٢٧يوليو قبل العيد ب ٣ ايام ...
ابويا بكى من الفرحة وصلى شكر لله ، كانت منحة وليست محنة وجدت فيها السلام الذى كنت ابحث عنه وبحث عنى ..سلاما ليس مثله سلام.
(المقال كتبته باللهجة المصرية الصعيدية ، انا تحت امركم فى اى استفسار ).🥰
التعليقات