كنت بقوم ببعض الأبحاث مؤخراً في إدارة الأعمال وتحديداً في استراتيجيات إطلاق المشاريع الناشئة ( Startups ) وكنت حابب أطرح معاكم موضوع للنقاش بيشغل بال أي حد بيبدأ بيزنس جديد.
في إدارة الأعمال فيه مدرستين دايماً بيتكلموا عن تحديد الفئة المستهدفة ونوع المنتجات:
- المدرسة الأولى: بتقول إنك لازم تبدأ في نيتش ضيق جداً ( Micro-Niche ) يعني بدل ما تفتح متجر إلكتروني شامل لكل الإلكترونيات لا تركز مثلاً على حل مشكلة واحدة محددة (زي إكسسوارات ومبردات الجيمنج للموبايل بس) الميزة هنا إنك بتقدر تسيطر على السوق ده وتضمن جودة عالية وبناء ثقة أسرع مع فئة مهتمة جداً.
- المدرسة الثانية: بتشوف إن النيتش الضيق ده فيه مخاطرة كبيرة وممكن يحجم نمو البيزنس والأرباح بسرعة، والأفضل هو التوسع من البداية لتغطية شريحة أكبر.
بناءً على دراستكم أو تجاربكم في إدارة الأعمال وإطلاق المشاريع:
- هل بتشوفوا إن التخصص الشديد في البداية هو الأضمن للنجاح وبناء براند قوي؟ ولا التوسع هو الأفضل؟
- إيه النماذج اللي شفتوها نجحت فعلاً لما ركزت على منتج أو حل لمشكلة معينة وضيقة جداً في السوق؟
حابب أسمع تحليلاتكم وآراءكم من زاوية بيزنس وإدارة أعمال
التعليقات