أول ما نزل #إعلان_فودافون ليلة أول يوم رمضان الناس كلها اتفاعلت مع فكرة ظهور #عبلة_كامل في الإعلان وأثار جدل كبير

وظهر ناس كتير تقول إنها دمعت وبكت أول ما شافتها

وبعدها ظهر ناس ع الجانب الآخر تتريق ع الناس دي وع فكرة التأثر بالموضوع، وادعوا إن الأمر ما هو إلا قانون القطيع وإن الناس بتكرر كلام بعض وخلاص

وده قد يكون صحيح في حالات كتير فعلاً

بس ع الجانب الآخر برضه أكيد فيه ناس اتفاعلت بالشكل ده حقيقة من غير توجيه ولا لإن آراء الناس التانية هي اللي ساقتهم

وأنا كنت من الناس دول اللي فعلاً دمعت أول مرة شفت فيها الإعلان مع ظهور عبلة كامل، وكان لسة ساعتها مظهرش الهليلة دي أصلاً عشان أتأثر بيها وتكون هي الحافز ع المشاعر دي

بس السؤال هنا واللي بيدعو الكتير للتشكيك في الأمر: هل مجرد ظهور عبلة كامل في الإعلان هو اللي خلى الناس اتفاعلت ودمعت؟

الحقيقة مظنش، ولو كان الإعلان عبارة عن إن عبلة كامل ظهرت لوحدها مثلاً تروج لشركة فودافون مكنش حد هيتفاعل بالطريقة دي

ممكن الناس كانوا يعبروا عن سعادتهم بشوفتها بعد غياب واشتياقهم ليها وكل الكلام ده لكن من غير التفاعل العاطفي الكبير ده

طب ايه السبب؟

الحقيقة أنا مقدرش أجزم يعني لكن ممكن أتكلم من تحليلي لمشاعري أنا الشخصية

الإعلان كان بيلعب ع مشاعرنا طول الوقت

من أول فكرة أصحاب العمر اللي بيمر وقت طويل شهور ويمكن سنين واحنا مش عارفين نقابلهم عشان مهروسين في الشغل والحياة دايسة علينا ومش سايبة لنا فرصة نتنفس ولما بنلاقي دقيقتين نتنفس فيهم بنبقى هلكانين وعايز نقعد نأنتخ بس، ومش قادرين نرجع لفرهدة الخروجات والفسح والتنطيط زي زمان

مروراً بذكريات المراهقة وبدايات الشباب عن الفترات اللي كنا بنكافح فيها عشان نخرج ساعتين تلاتة أو نتأخر ربع ولا نص ساعة زيادة عن الميعاد المعتاد، والمحايلات اللي مبتخلصش، والخطط اللي بنحطها في كل خروجة عشان نظفر بس بشوية دقايق زيادة من المرح

ده غير مشهد #محمد_منير اللي بصراحة شحني عاطفياً جداً بفكرة كبره في السن وإحساسي إنه تعبان صحياً ومش قادر يتحرك والكلام طالع منه بالعافية، مع دلالة ده المنطقية بإحتمالية وصوله لمرحلة اليقين (ربنا يبارك في عمره) وإحساس النوستالجيا في ده إننا هنخسر كل حاجة بتربطنا بالزمن الجميل وبهويتنا القديمة

ده إحساس شخصي بالنسبة لي ممكن ميكونش حد فكر فيه غيري أصلاً، بس بالنسبة لي كل الحاجات دي شحنتني عاطفياً بما فيه الكفاية؛ فجه مشهد الذروة (التمثيلي) بشعور واحدة بتتفاجئ بناس بتحبهم جايين لها مفاجأة بعد غياب طويل، حتى لو مكنتش الواحدة دي عبلة كامل أصلاً وكان المشهد تمثيلي بحث بممثلين عاديين مش بشخصياتهم الحقيقية كنا هنوصل لنفس التأثير العاطفي

#إعلان_فودافون_رمضان_2026

#إعلانات

#سارة_الليثي