كيف يمكننا محاربة (التسويق الشبكي والهرمي) في بلادنا؟

اتعرض عليا مرتين، مرة كنت مقتنع نص نص ووالدي قالي لا بلاش احسن.

والمرة الثانية جالي اتصال من صديق مكلمنيش من فترة طويلة، وقالي فيه شغل وهيكسب كتير وبسرعة، قولتله لا بلاش، قالي تعالي بس، قولتله الشغل ايه ؟ قالي لما تيجي قولتله لا خلاص انا مش عايزه وانا عارف انت بتتكلم عن ايه، قالي تعالي بس قولتله هاجي عشان اشوفك مش اكثر.

وروحت واتناقشت مع الي كان بيكلمني، الي هو مشغل صاحبي، قام قالي في الاخر انت حتي لو غيرت رايك وعايز تيجي مش هندخلك معانا الشغل ده :D

للاسف النوع ده انتشر بشدة، وكل ما شركة تبوظ نفس الاشخاص بينقسموا وكل واحد بيفتح شركة جديدة ويضيف عليها بعض المميزات والحركات عشان تبان انها حاجة تاني وانها شركة ليها اهداف وبتبني الاقتصاد والخ الخ الخ

الشاهد انه فيه كذا نقطة بيركزوا عليها عشان تجذب الناس :

1- بيهتموا جدا بمظهرهم، وبيصرفوا كتير، عربيات وبدل والخ الخ وهو فعلا ربح من الموضوع ده

2- بيركزوا على ناس حالتهم المادية مش كبيرة، ومعندهمش استعداد يخسروا المبلغ ( 1800 - 2500 - 4000 ) الي دفعوه للاشتراك

3- بيجيبوا امثال واهية زي رونالد ترامب وانه بيل جيتس قال لولا مش عارف ايه كنت اشتغلت بنظام التسويق الشبكي.

4- بيدفعوا فلوس لاماكن الناس تثق فيها، زي مؤسسات وطنية، واندية مشهورة، وحفلات بمغنيين مشهورين عشان يكتسبوا مصداقية والخ.

5- واخدين كورسات كويس ومدربين على التاثير في نفسية الناس.

6- بيلعبوا على احلام الناس وطموحاتهم ونظرآ لانتشار البطالة فالموضوع ده في صالحهم.

7- الناس بقت مادية وفقدت قيمة الحياة عموما وده بيخلي عندهم عجز في التفكير وقصور في الوعي.

8- بيعملوا حفلات بناس ببدل وعربيات وكلام حماسي بيخليهم يحسوا انهم فعلا على طريق النجاح والثروة.

بالنسبة لمشكلة الناس الي بتعارضهم وبيردوا عليهم بيكون ردهم فيه قصور بسبب انه بيقولوهم انتوا نصابين والخ الخ وهما حرفيا مش كدة، هو اه فيه فلوس وهتكسب فلوس بس الفكرة ازاي هتكسبهم وهتخسر ايه قدام المكسب ده "بافتراض انك محظوظ وهتكسب" وكمان فيه حد للمكسب ده وبعده هتنهار الشركة والباقي ربنا يعوض عليهم وهيكون فيه كام فرد فقط هما الي اتربحوا وكسبوا ملايين.

الحلول ممكن تكون توعية الناس بانه دي مش صناعة وانه ده مجرد بيع كلام مش بيع منتجات وعمولات والوهم الي بيتقال ده، تقديم نموذج بديل للناس للشغل زي الفريلانسر والخ الخ من المجالات المختلفة الي مش محتاجة شهادات جامعية ووسائط.

محاولة وجود تنمية ووعي حقيقي بعيدآ عن اجواء التنمية البشرية والحماس المعنوي الفارغ.