الانسان هو نتاج قناعاته

الطبيعي ان الانسان بيعمل حاجة وتفشل فدا معناه ان هو عمل حاجة غلط فالنتيجه النهائية فشلت، انما مش الطبيعي -والي بيحصل علطول- ان الشخص بيعمل حاجة اكتر من مره بنفس الاخطاء او اخطاء مختلفه او يلاحظ تكرار حاجة معينه فحياته فيبني عليها قناعه شخصية ان هو يعرف يعمل الحاجة ده

مثلا الناس -الكتير- الي بيقولوا ان هم ناس نهاريين ميعرفوش يكونوا مركزين او يذاكروا بالنهار وبيركزوا فقط بليل، هو ممكن يكون حاول يصحى بالنهار وفشل ل 100 سبب، منهم مده النوم والتعود ودورات النوم الي مش منتظمه او نظام الاكل الخ....

يلاحظ ان هو مش بيعرف يصحى بالنهار فيقرر ان هو انسان ليلي وبيركز فقط بليل فبالتالي كل اما يحاول يصحى بالنهار هيكسل عشان هو اقنع نفسه بكده ومقتنع كمان ان هو معاه دليل ان هو كدا!

فعلى كدا تلاقي شخص يقولك انا منظم وبحب النظام والتاني يقول اصل النظام دا حاجة معقده وصعبه على الفاضي وملهاش لازمه، دا مش ممكن يكون منظم عشان هو مش عايز

واحد تاني يقول انا معرفش احل مسائل مثلا فانا مينفعش ادخل هندسه والتاني يقول انا معرفش اتعامل مع الناس فمينفعش ابقا دكتور مثلا وهكذا تلاقي الشخص مكون قناعات عن نفسه مش حقيقية وهي الي بتكون شخصيته فالاخر

وهنا يبان بوضوح معنى الاية (إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ)