فى نهاية مسرحية ( اوبريت ) ملك الشحاتين لنجيب سرور
يا شعب يا معلم
يا صابر اتكلم
علمنا و اهدينا
عدينا عدينا
يا شعب ياما مشيت
ياما بحور عديت
ياما جبال هديت
ياما يا شعب بنيت
قول ع الهرم مواويل
يا شعب يا قويل
خلى الزمان يحكى
ع الشاكى و المشكى
يا ليل يا عين يا ليل
يا جيل يغنى لجيل
عدينا مليون بحر
و صبرنا مر الصبر
و ضحكنا و بكينا
يا شاهدة يا عينينا
و مصر هى مصر
و الاجر هو النصر
يا ارض مالها مثيل
يا وهبة جابها النيل
يمين يا مصر يمين
بالطين و غالى الطين
ما تعتبك اقدام
الا بخير و سلام
وان عتبك طاغى
دورى على الباغى
و ان عتبك مغرور
العقبى ع اللى يجور
و ان عتبك طمعان
ما يلاقى فيكى امان
و ان عتبك ملعون
لو حتى نابليون
و التين و الزيتون
لتولعى يا مصر
و يكون ترابك جمر
يا شعب يا انسان
يا معلم الانسان
صوتك هدى م الرب
و صوته صوت الشعب
الله يا شعب الله
يا شعب دينه حياة
يا شعبنا ماشيين
و الرك ع الجايين
هايكملوا المشوار
و هايسهروا للتار
و تعالوا يا اولادنا
و اتوصوا ببلدنا
و زى نن العين
صونوها بين جفنين
يا شعب يا معلم
يا صابر اتكلم
علمنا و اهدينا
عدينا عدينا
الصف بعد الصف
و الالف بعد الالف
و كل روح على كف
فداكى يا بلدى
