يا طوبه حمرا وطوبه خضرا وطوبه البنا يضرب فيها بالموال
خليكِ لولاد الشقا مخطوبه أغنى غنى اللى ماله غيرك مال
مهر العرايس كل يوم جاى لك
والليل يجيب الشمس ويخايلك
وكل من شافك صبح شايلك
أمنيه من رب العباد مطلوبه يجعل حمولك زينة الحمال
يا طوبه حمرا وطوبه خضرا وطوبه
ما تنخدعشى يا زمن احنا
الطيبه تنطق فى ملامحنا
لكن خفاف ، الله يسامحنا
ياما افتكرنا الطيّبه معطوبه
ياما لعبنا وياما كنا عيال
يا طوبه حمرا وطوبه خضرا وطوبه
عينى على الأرض اللى حبتها
واللى توانى سقفها وبيتها
وحكيت عن الأبطال فى غابتها
يا قمح مصر ويا سمار النوبه ياما حتحبى بعدنا أبطال
يا طوبه حمرا وطوبه خضرا وطوبه
زى اللى خدته من الشهيد أدى
الفرض دايم وانت بتؤدى
اعشق بلادك يا ضنا قدى
ياما ليالى ع الجبين مكتوبه ما احناش يا ولدى آخر الأجيال
يا طوبه حمرا وطوبه خضرا وطوبه
أحببت الإيقاع والحركة في الأبيات، كأن الكلمات نفسها تمشي بين الطوب الأحمر والأخضر والبني. الشعور بالحنين والحياة اليومية، مع لمسة فخر بالأبطال والصبر، شيء يلمس القلب. فؤاد حداد دائمًا يتميز بقدرته على تصوير مصر والناس بحس وطني وشعوري عميق.
التعليقات