صباح الخير علي الورد اللى فتح فى جناين مصر
صباح العندليب يشــــدي بألحان السبوع يا مصر
صــبـاح الداية واللفة ورش الملح فى الزفة
صباح يطلع بأعلامنا من القلعة لباب النصر
سلامتك يامة يا مهرة يـا حبالة يا ولادة
يا سـت الكل يا طاهرة
سلامتك من آلام الحيض من الحرمان من القهرة
سلامة نهدك المرضع سلامة بطنك الخضرا
هناكي وفرحة الوالدة تضمي الولد يا والدة
يصونهم لك ويحميهم يكترهم يخليهم
يجمع شــملهم بيكي يتمم فرحتك بيهم
صباح الخير علي ولادك صباح الياسمين والفل
تعيشي ويفنوا حسادك ويسقوهم كاسات الذل
وبلغ يا سـمير غطاس يا ضيف المعتقل سنوي
بصوتك دا اللى كله نحاس
صباح الخير على الثانوي
وأهلا بيكو فى القلعه وباللي فى الطريق جايين
ما دامت مصر ولاده وفيها الطلق والعادة
حتفضل شمسها طالعة برغم القلعة والزنازين